Füzuli rayonunda mina partladı

Traktorun biri minaya düşüb, digəri isə minanı üzə çıxarıb

Füzuli rayonunun Alxanlı kəndi yaxınlığında mina hadisəsi baş verib. Azərbaycan Ərazilərinin Minalardan Təmizlənməsi üzrə Milli Agentliyin (ANAMA) Horadiz Regional Bazasından APA-ya verilən məlumata görə, gecə vaxtı əraziyə daxil olan iki tırtıllı traktordan biri ərazini şumlayarkən tank əleyhinə minaya düşüb. Digər traktor isə şumlama zamanı 1 ədəd tank əleyhinə minanı üzə çıxarıb. Partlayış zamanı bir nəfər yüngül xəsarət alsa da, digərləri zərər çəkmədən ərazini tərk ediblər. Hadisə yerinə gələn ANAMA-nın əməkdaşları şumlanan ərazidə müharibə dövründə tank əleyhinə minaların basdırıldığı zolaq aşkar ediblər. Əraziyə baxış zamanı 6 ədəd tank əleyhinə minanın olduğu aşkarlanıb, hazırda onların zərərsizləşdirilməsi istiqamətində tədbirlər görülür.

ANAMA-dan onu da bildiriblər ki, cəbhə xəttinin bir neçə yüz metrliyində yerləşən bu ərazilərin minalı olması barədə əhaliyə indiyədək dəfələrlə xəbərdarlıq olunub.