Bəzən dünya hitinə çevrilən mahnıların yaranması üçün nə böyük studiya, nə də uzun hazırlıq lazım olur. Məşhur musiqiçilərin bəzi əsərləri restoranda, barda, salfet üzərində, hətta pizza qutusunda yazılıb.
Lent.az xarici KİV-ə istinadla xəbər verir ki, aşağıda adları qeyd edilən və illərdir dinlənilən məşhur mahnıların arxasında da olduqca maraqlı hekayələr dayanır.
Con Bon Covi – “Şöhrət alovu”
Con Bon Covinin ən məşhur mahnılarından biri olan “Şöhrət alovu” “Gənc silahlar II” filmi üçün yazılıb.
Aktyor Kifer Sazerlendin sözlərinə görə, Bon Covi şam yeməyi zamanı Emilio Estevezə filmin davamı üçün musiqi yazmaq istədiyini deyib. Digərləri söhbət edərkən musiqiçi ağlına gələn fikirləri salfetlərin üzərinə qeyd etməyə başlayıb.
Təxminən 15 dəqiqə sonra “Şöhrət alovu” hazır olub. Bon Covi daha sonra həmin salfetləri Estevezə verib. Aktyorun bu üç salfeti hələ də çərçivəyə salaraq evində saxladığı bildirilir.
Mahnı 1990-cı ildə yayımlanıb, “Billboard Hot 100” siyahısında birinci yerə yüksəlib və 21 həftə zirvədə qalıb. “Şöhrət alovu” 1991-ci ildə “Golden Globe” mükafatına layiq görülüb, həmçinin “Oskar” və “Qremmi” mükafatlarına namizəd olub.
“Beastie Boys” – “Əylənmək haqqın üçün mübarizə apar”
1986-cı ilin yayında “Beastie Boys” üzvləri prodüser Rik Rubinlə birlikdə Nyu-Yorkdakı “Palladium” klubunun “Michael Todd Room” zalında oturublar. Mayk Daymondun sözlərinə görə, onlar qreypfrut şirəsi ilə araq içir və gələcək mahnının sözlərini kokteyl salfetlərinin üzərinə yazırdılar. Mahnının yazılmasına cəmi beş dəqiqəyə yaxın vaxt sərf olunub.
“Əylənmək haqqın üçün mübarizə apar” sonradan “Billboard Hot 100” siyahısının ilk onluğuna daxil olub və “Beastie Boys” qrupunun ən məşhur mahnılarından birinə çevrilib.
“Eagles” – “Yalançı gözlər”
“Yalançı gözlər” mahnısının hekayəsi Qərbi Hollivuddakı “Dan Tana's” restoranında başlayıb.
Qlenn Frey və Don Henli restoranda gənc qadının özündən xeyli yaşlı və varlı kişi ilə oturduğunu görüblər. Frey həmin qadının yalançı baxışlarını gizlədə bilmədiyini deyib.
Bu ifadə musiqiçilərin diqqətini çəkib. Onlar dərhal salfetləri götürərək gələcək mahnı üçün fikirlərini yazmağa başlayıblar. Mahnının hazırlanması asan gedib və iki gecə ərzində tamamlanıb.
“Yalançı gözlər” 1975-ci ildə yayımlanıb, “Billboard Hot 100” siyahısında ikinci yerə yüksəlib və “Eagles” qrupuna “Qremmi” mükafatı qazandırıb.
“Warrant” – “Albalı piroqu”
“Warrant” qrupunun solisti Cani Leyn “Albalı piroqu” mahnısını təxminən 15 dəqiqəyə yazıb.
“Columbia Records”un rəhbəri Don Yenner qrupdan ikinci alboma güclü bir mahnı əlavə etmələrini istəyib. Məlumata görə, Leyn mahnının sözlərini dostunun mətbəxində boş pizza qutusunun üzərinə yazıb.
Əvvəlcə albomun “Tom dayının daxması” adlandırılması planlaşdırılırdı. Lakin yeni mahnı yazıldıqdan sonra albomun adı dəyişdirilərək “Albalı piroqu” qoyulub. Mahnı 1990-cı ildə yayımlanıb və “Billboard Hot 100” siyahısının ilk onluğuna daxil olub.
Qart Bruks – “Aşağı yerlərdə dostlarım”
Qart Bruksun ifa etdiyi “Aşağı yerlərdə dostlarım” mahnısının müəllifləri Dueyn Blekvell və Erl Bad Lidir.
Mahnının adının yaranması isə təsadüfi zarafatla bağlıdır. Bir dəfə restoranda hesabı ödəməyə pullarının çatmadığını anlayan Erl Bad Li zarafatla həmin restoranda işləyən tanışı olduğunu və aşağı zalda dostlarının olduğunu deyib.
Bir neçə ay sonra müəlliflər bu ifadəni yenidən xatırlayıblar. Əllərinin altında kağız olmadığı üçün mahnının əsas fikirlərini salfetlərin üzərinə yazıblar. Qart Bruks əvvəlcə mahnının demo versiyasını hazırlayıb, daha sonra isə onu ikinci albomu “Hasarsız”a daxil edib.
“Aşağı yerlərdə dostlarım” 1990-cı ildə “Billboard Hot Country Songs” siyahısında birinci yerə yüksəlib və dörd həftə zirvədə qalıb.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
