Avropa istiqamətləri payız aylarında xüsusilə cəlbedici olur — rahat Kopenhagendən və mistik İrlandiyadan qızılı rəngə bürünən Dolomitlərə və qastronomiyası ilə seçilən Umbriyaya qədər.
İsti Avropa yayından sonra səyahət üçün heç də az cəlbedici olmayan başqa bir mövsüm başlayır. Payızda məşhur şəhərlərdə turistlərin sayı azalır, hava uzun gəzintilər üçün əlverişli olur, qiymətlər və ümumi atmosfer isə Avropanı fərqli tərəfdən görməyə imkan verir.
Lent.az xarici mediaya istinadən payızda diqqət yetirməyə dəyər yeddi istiqaməti açıqlayıb.
Kopenhagen və Danimarka Rivyerası, Danimarka
Payızda Danimarkanın paytaxtı qızılı rəngə boyanmış ağacların arasında gəzinti, rahat kafelər, çörəkbişirmə məkanları və restoranları ilə xüsusilə cəlbedici görünür. Səyahəti Şimali Zelandiya bölgəsinə səfərlə də zənginləşdirmək mümkündür. Burada Kronborq qalası, meşələr, sahil zonaları və Louisiana Müasir İncəsənət Muzeyi yerləşir.
Vyana, Avstriya
Payız aylarında Vyanada parklarda gəzmək, muzey və qalereyaları ziyarət etmək, məşhur Vyana şnitselinin dadına baxmaq və şəhərdən kənardakı üzüm bağlarına getmək mümkündür. Eyni zamanda şəhər tarixi atmosferi yeni restoranlar, otellər və mədəniyyət məkanları ilə birləşdirir.
San-Sebastyan, İspaniya
Bu şəhər xüsusilə qastronomiya həvəskarları üçün maraqlıdır. Burada Michelin ulduzlu çoxsaylı restoranlar, məşhur pintxoslar və zəngin bar mədəniyyəti var. Payızda havanın mülayim olması sahil boyu uzun gəzintilər üçün əlverişli şərait yaradır. Oktyabr ayında şəhərdə yeni Bask mətbəxinin 50 illiyinə həsr olunan San Sebastián Gastronomika festivalı da keçiriləcək.
Mərkəzi İrlandiya
Payızda bu bölgəyə səyahət mistik ab-havanı sevənlərin xoşuna gələ bilər. Mit qraflığında qədim Kelt ənənələri ilə bağlı tarixi məkanlar yerləşir. Oktyabrın 29-dan noyabrın 1-dək burada Púca festivalı keçirilir. Turistlər həmçinin ölkənin qərbinə — Konnemara sahillərinə, Kler və Mayo qraflıqlarına səfər edə bilərlər.
Paris, Fransa
Payızda Fransanın paytaxtı yay turist axınından sonra daha sakit olur. Bu dövr muzeyləri gəzmək, parklarda vaxt keçirmək və yeni sərgilərlə tanış olmaq üçün əlverişli hesab edilir.
Dolomitlər, İtaliya
Payızda dağların yaşıl rəngləri tədricən qızılı tonlarla əvəzlənir, turistlərin sayı azalır, hava isə hələ də yürüşlər üçün münasib qalır. Dolomitlər xüsusilə oktyabrın ortalarında və ikinci yarısında, qaraşam ağaclarının yarpaqları saralmağa başlayanda daha gözəl görünür.
Umbriya, İtaliya
İtaliyanın bu bölgəsi ölkənin “yaşıl ürəyi” adlandırılır. Payızda burada trüfel və zeytun yığımı aparılır, üzüm yetişir, orta əsr şəhərləri və kəndləri isə xüsusi atmosfer qazanır. Turistlər Assizini, Perucadakı muzeyləri və bölgənin təbiət ərazilərini ziyarət edə bilərlər.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
