Xəyanət düşündüyümüzdən qat-qat çox yayılmış bir fenomendir. Çoxsaylı tədqiqatlara görə, hər beş kişidən biri bir dəfə də olsun, partnyoruna sədaqəti pozub. Lakin psixoloqlar vurğulayırlar ki, xəyanətin əsas səbəbləri nadir hallarda cinsi istək və ya təsadüfi cazibə ilə məhdudlaşır. Onlar çox vaxt uşaqlıqda formalaşmış dərin emosional proseslərdən qaynaqlanır.
Niyə kişilər sevdikləri qadınlara xəyanət edirlər?
Lent.az xəbər verir ki, psixoanalitik Cülyet Rozenfeldin sözlərinə görə xəyanət adətən hadisənin özündən çox öncə başlayır. Bu, qəfil verilən qərar yox, daxili ağrının, yorğunluğun və dərinlikdə yatan natamamlıq hissinin nəticəsidir.
Rozenfeldin pasiyentlərinin təcrübəsi əsasında ən çox rast gəlinən səbəblər:
1. Şəraitin təzyiqi və daxili böhran
Bir çox kişilər özlərini hələ də ailənin əsas təminatçısı kimi görürlər və bu, məsuliyyət hissini və narahatlığı artırır. İşin itirilməsi, maliyyə çətinliyi, yaxınların xəstəliyi yaxud orta yaş böhranı boşluq və gücsüzlük hissini gücləndirir.
Məsələn, 49 yaşlı bir pasiyent işsiz qaldıqdan sonra roman axtarmağı romantika üçün deyil, öz dəyərini sübut etmək üçün etmişdi. Onun xəyanəti status və özünəinam itkisini kompensasiya cəhdi idi.
2. Depressiyadan qaçış forması
Bəzən münasibətlər kənarda insanın problemlərdən səmimi şəkildə danışmaq əvəzinə qaçış yoluna çevrilir. Pasiyentlərdən biri depressiyadan əziyyət çəkirdi, lakin bunu həyat yoldaşından gizlədirdi. Dəstək axtarmaq əvəzinə, daha enerjili bir qadınla münasibətdə müvəqqəti təsəlli tapdı. Bu addım problemi həll etmədi, sadəcə ağrını qısa müddətlik susdurdu.
3. Özünü lazım və qəbul olunmuş hiss etmək arzusu
Bəzi kişilər sevgi olmadığı üçün deyil, emosional qarşılıq çatışmadığı üçün xəyanət edirlər. Onlar yalnız uğuruna və puluna görə deyil, şəxsiyyət olaraq da dəyərləndirilmək istəyirlər.
Məsələn, biznesmen Tim həyat yoldaşını sevirdi və onu ən yaxşı dostu sayırdı. Onun xəyanəti çətin uşaqlıqdan qaynaqlanan daxili utanc hissindən xilas olmaq və şərtsiz qəbulun dadını hiss etmək cəhdi idi.
4. Xəyanət — yardım çağırışı kimi
Bəzən xəyanət bir növ SOS siqnalıdır. Sözlə ifadə olunmayan ağrının başqa yolla göstərilməsi. Uzun müddət alçaldılmış və ya dəyərsizləşdirilmiş kişi tanınma və istiliyi başqa münasibətdə axtara bilər.
Məsələn, Tobias həyat yoldaşının daimi tənqidini və soyuqluğunu illərlə dözürdü. Yalnız xeyriyyə təşkilatında tanış olduğu mehriban qadınla təmasdan sonra nə dərəcədə bədbəxt olduğunu anladı. Roman onun üçün qaçış yox, hörmət və nəvaziş olan həyata keçid idi.
5. Qocalıq və cəlbedicilik itkisindən qorxu
Yaş artdıqca kişilər fizioloji dəyişikliklərlə üzləşirlər. Libidonun azalması, yorğunluq, xarici görünüşlə bağlı narahatlıq. Özünü hələ də cazibədar olduğuna inandırmaq üçün onlar çox vaxt gənc qadınlarla münasibətə başlayırlar.
Məsələn, Robert həyat yoldaşının menopauzaya girdiyi dövrü bəhanə edərək xəyanətini “uyğunsuzluq”la izah edirdi. Əslində isə bu davranış qocalıq qorxusunun təzahürü idi.
Xəyanət — daxili ağrının simptomu kimi
Psixoanalitik vurğulayır ki, çoxluq təşkil edən xəyanətlərin kökündə ehtiras deyil, emosional çaşqınlıq dayanır. Kişi partnyorunu sevmədiyi üçün deyil, içindəki tənhalıq, qorxu və ya günahkarlıqla baş edə bilmədiyi üçün xəyanət edir.
Müasir araşdırmalar təsdiqləyir ki, xəyanət çox vaxt həyat narazılığı və aşağı özünəqiymətlə bağlıdır, nəinki intim yaxınlığın çatışmazlığı ilə. Psixoloqlar bildirirlər ki, belə hallar qəfil xəyanət kimi yox, dərin şəxsi və ya cütlük problemlərinin siqnalı kimi qəbul edilməlidir.
Kinsi İnstitutunun məlumatına görə, orta yaş böhranı yaşamış kişilərin təxminən 40%-i etiraf edib ki, xəyanət onlara rahatlıq gətirməyib, əksinə, günahkarlıq və boşluq hissini gücləndirib.
Beləliklə, xəyanət həmişə ehtirasın nəticəsi deyil. Daha çox insanın özü ilə apardığı daxili mübarizənin, ağrını kompensasiya cəhdinin və ya qocalıq qorxusunun əksidir. Lakin Cülyet Rozenfeldin fikrincə, belə məqamlar cütlüyü ya dağıda, ya da əksinə açıq danışıq və qarşılıqlı daxili iş sayəsində sağalma prosesinə apara bilər.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
