Vəkil tanışını öldürüb sobada yandırdı

Moskva vilayətində vəkil Sergey Zuev əmlak mübahisəsi zamanı tanışını ürəyinə 3 bıçaq zərbəsi vuraraq öldürüb.

Lent.az-ın xarici mediaya istinadla məlumatına görə, bununla da dayanmayaraq, o, şərikləri ilə birlikdə meyiti fermaya apararaq kremasiya sobasında yandırıb. Onlar qətllə yanaşı, dələduzluqda da ittiham olunurlar: cinayətkarlar qurbanın əmlakını sataraq 5 milyon rubldan çox pul qazanıblar. Cinayətdə əli olanların hamısı saxlanılıb.

Moskvalı vəkil Sergey Zuev tanışını qətlə yetirmək, onun meyitini yandırmaq, sonra isə zərərçəkmişin əmlakından dələduzluq yolu ilə istifadə etmək ittihamı ilə həbs edilib. Bu barədə Rusiya İstintaq Komitəsinin Moskva şəhəri üzrə Baş İstintaq İdarəsi məlumat yayıb. Qətldən əlavə, Zuev və onun tərəfdaşları xüsusilə böyük miqyasda dələduzluqda və xüsusilə ağır cinayətləri gizlətməkdə ittiham olunurlar.

İstintaqın məlumatına görə, 2024-cü il oktyabrın 20-dən gec olmayaraq, Sergey Zuev Moskva vilayətinin Solneçnoqorsk rayonundakı bağ evində tanışı ilə əmlakın satışı ilə bağlı fikir ayrılıqlarına görə münaqişəyə girib. Mübahisə zamanı vəkil zərərçəkənin ürək nahiyəsinə azı 3 bıçaq zərbəsi vurub və o, yerindəcə dünyasını dəyişib.

Cinayətin izlərini gizlətmək üçün Zuev və dostu meyiti maşına qoyublar. Onun sözlərinə görə, dostun qətldən xəbəri olmayıb. Daha sonra onlar Zuevə məxsus fermaya gəliblər və orada qalıqlar kremasiya sobasında yandırılıb.

Bundan sonra Zuev qətlə yetirilən şəxsin 5 milyon rubldan çox dəyərində olan əmlakını qanunsuz olaraq satmaq üçün başqa bir şəriki cəlb edib.

İstintaq hüquq-mühafizə orqanlarına paytaxtda bir nəfərin itməsi barədə məlumat daxil olduqdan sonra başlayıb. Müstəntiqlər zərərçəkmişin yoxa çıxdığı günlərdə onun marşrutunu təfərrüatlı şəkildə yenidən qurub, müşahidə kameralarının görüntülərini öyrənib və bir sıra şahidləri dindiriblər.

Moskvanın İstintaq Komitəsinin müstəntiqləri və əməliyyat əməkdaşlarının əlaqələndirilmiş tədbirləri nəticəsində cinayət işində iştirak edən bütün şəxslər müəyyən edilərək saxlanılıb. Onlara qarşı cinayət işi açılıb və nəzarətə götürülüblər.