Sağlam həyat tərzi bir çox mif və yanlış təsəvvürlərlə əhatə olunub. Onların bəziləri isə insan sağlamlığına ciddi zərər verə bilər. Son illərdə sağlam həyat tərzinə maraq dəb halını alıb. Lakin populyarlaşan tövsiyələrin hamısı həqiqətən faydalı deyil. Onların bir qismi sadəcə yanlış inanclardır və əksinə, zərərli nəticələrə səbəb ola bilər.
Lent.az bu mifi təqdim edir:
Həddindən artıq sağlam həyat tərzi həvəsi də zərərlidir
Psixoloqların fikrincə, sağlam həyat tərzinə aludəçilik streslə nəticələnə bilər. Vərdişlərin qəfil dəyişdirilməsi, sərt məhdudiyyətlər və yoxlanılmamış məsləhətlərə kor-koranə əməl etmək insanı həm fiziki, həm də mənəvi cəhətdən tükəndirir. Nəticədə sağlamlıq bundan zərər görür.
Mif: karbohidratları tamamilə çıxarmaq lazımdır
Karbohidratların fiquranın düşməni olduğu fikri bir çox insanı ifrata aparır. Onlar makaron, çörək və yarmalardan tam imtina edirlər. Halbuki orqanizmin normal fəaliyyəti üçün karbohidratlara ehtiyacı var. Onların çatışmazlığı baş ağrısı, halsızlıq, əsəbilik və diqqət problemlərinə səbəb ola bilər.
Mif: mütləq gündə 2 litr su içmək lazımdır
Su həqiqətən vacibdir, lakin sabit miqdar hamı üçün uyğun deyil. Mayeyə olan ehtiyac bədən çəkisindən, fiziki aktivlikdən və iqlimdən asılıdır. Suyun həddindən artıq qəbulu elektrolit balansını poza, şişkinlik və ya duzların yuyulması səbəbilə başgicəllənmə yarada bilər.
Mif: piy yandıran məhsullar mövcuddur
Ananas və qreypfrut kimi meyvələr tez-tez piy yandıran məhsullar kimi təqdim olunur. Lakin insan düzgün qidalanmaya və fiziki aktivliyə əməl etmirsə, bu məhsullar təsir göstərmir. Arıqlamaq üçün möcüzəvi məhsullar mövcud deyil, xüsusilə sosial şəbəkələrdə reklam olunan bahalı detoks şirələri və tozlar bu kateqoriyaya daxildir.
Mif: beynin şirniyyata ehtiyacı var
Beyin həqiqətən enerji mənbəyi kimi qlükozadan istifadə edir, lakin bu o demək deyil ki, ona konfet və şirniyyatlardakı şəkər lazımdır. Enerjini tam taxıllı məhsullar, meyvə və tərəvəzlərdən almaq daha faydalıdır. Bu məhsullar qlükoza səviyyəsində kəskin sıçrayış yaratmadan uzunmüddətli enerji verir.
Mif: təbii kosmetika daha təhlükəsizdir
Hər təbii kosmetika zərərsiz deyil. Bəzi bitki tərkibli maddələr qıcıqlanma və allergik reaksiyalar yarada bilər. Yüksək qiymət də həmişə keyfiyyət demək deyil. Əksinə, klassik kosmetik vasitələr testlərdən keçirilir və tərkibi nəzarət altındadır.
Mif: hər gün məşq etmək lazımdır
Fiziki aktivlik faydalıdır, lakin fasiləsiz gündəlik məşqlər tükənməyə, hormonal pozuntulara və mikrotravmalara səbəb ola bilər. Hər kəs üçün uyğun yük norması fərqlidir və yaş, hazırlıq səviyyəsi, ümumi sağlamlıq vəziyyəti nəzərə alınmalıdır.
Mif: qaçış ideal idman növüdür
Qaçış ürəyi möhkəmləndirir və dözümlülüyü artırır, lakin hər kəs üçün uyğun deyil. Səhv texnika və ya uyğun olmayan ayaqqabı oynaqlara, dizlərə və onurğaya zərər verə bilər. Qaçışın faydalı olması üçün isinmə, uyğun ayaqqabı və yumşaq səth vacibdir.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
