Britaniyalı həkimlər yaxınlaşan infarkt barədə xəbər verə biləcək iki narahatedici əlaməti qeyd ediblər. Ürək infarktları həm Böyük Britaniyada, həm də bütün dünyada ölümün aparıcı səbəblərindən biridir. Miokard infarktı, adətən tromboz nəticəsində, qan axınının qəflətən ürək əzələsinə dayanması ilə yaranır. Əsas səbəblərdən biri koronar arteriyalarda yağ çöküntülərinin yığılmasıdır ki, bu da damarların daralmasına gətirib çıxarır.
Lent.az xarici KİV-ə istinadən xəbər verir ki, xüsusilə 60 yaşdan sonra sağlamlığa nəzarət etmək, həmçinin artıq çəki, şəkərli diabet, yüksək xolesterin və ya qan təzyiqi problemləri olduqda daha diqqətli olmaq lazımdır.
İlk siqnal həzm sistemi ilə bağlı simptomlardır: ürəkbulanma, mədə narahatlığı, turşu qayıtması (qıcqırma) və ya ağrılı hisslər. Bu əlamətlər xüsusilə qadınlarda daha çox müşahidə olunur, çünki onlar çox vaxt klassik döş qəfəsi ağrısı deyil, məhz bu cür “gizli” infarkt simptomlarını yaşayırlar.
İkinci xəbər edici faktor yuxuda boğulma və ya hava çatışmazlığı hissini xatırladan qeyri-adi dərəcədə güclü və fasiləli xoruldama. Bu simptom ürəyə əlavə yük yarada bilər və səbəbin müəyyən edilməsi üçün təcili mütəxəssis məsləhəti tələb edir. Çox vaxt bunun arxasında yuxu apnoesi və ya digər tənəffüs pozğunluqları dayanır ki, bunlar ürək-damar fəsadlarının riskini artırır. Ən geniş yayılmış klassik infarkt əlamətlərinə döş qəfəsinin mərkəzində güclü, sıxıcı ağrı, bu ağrının qollara, çiyinlərə, kürəyə və ya çənəyə yayılması, başgicəllənmə, ürəkbulanma və nəfəs darlığı daxildir.
Həkimlər əlavə edirlər ki, ürək xəstəliklərinin profilaktikasına qan təzyiqinə, xolesterin və qan şəkərinə nəzarət, siqaretdən imtina, müntəzəm fiziki aktivlik və sağlam qidalanma daxildir. Risk qrupunda olan insanlara isə həkimlər ildə ən azı bir dəfə kardioloji müayinədən və EKG-dən keçməyi məsləhət görürlər ki, infarkt təhlükəsini vaxtında aşkar etmək mümkün olsun.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
