Bir çox cütlük elə düşünür ki, etibar bir anda yox olur. Psixoloqlar isə bildirir ki, etibar yavaş-yavaş, demək olar ki, hiss olunmadan itir və bir gün insan anlayır ki, münasibətdə boşluq yaranıb.Hər kəs bəzən səhv edir və ilk baxışda bu səhvlər xırda bir detal kimi görünür. Amma məhz həmin “xırda” hesab edilən addımlar zamanla iki insanın arasına çat salır.
Lent.az xarici mediaya istinadən xəbər verir ki, ailə psixologiyası üzrə mütəxəssislərin fikrincə, etibar bir hadisə ilə deyil, təkrarlanan davranışlarla dağılır. Üstəlik, çox vaxt tərəflər özlərinin qarşı tərəfi incitdiyini belə hiss etmirlər.
Etibarı sarsıdan ən geniş yayılmış səhvlərdən biri yarımçıq danışmaq, hissləri gizlətməkdir. İnsanlar duyğularını açıq ifadə etməkdən çəkinir, narazılıqlarını içində saxlayır və nəticədə əsəb, gərginlik yığılıb qalır.
Psixoloqların sözlərinə görə, gizli incikliklər tədricən məsafəyə çevrilir. Bu hisslər insanın daxilində nə qədər uzun yaşasa, onları dilə gətirmək də bir o qədər çətinləşir.
Kişilər çox vaxt mübahisə yaranmasın deyə danışmaqdan yayınırlar. Qadınlar isə bu susqunluğu laqeydlik kimi qəbul edir. Nəticədə anlaşılmazlıq dərinləşir və etibar zəifləməyə başlayır.
Ekspertlər bildirir ki, dialoqun olmaması etibarın ən böyük düşmənidir. Sözsüz, danışmadan tərəf müqabilinin nə düşündüyünü, nə hiss etdiyini anlamaq mümkün deyil.
Digər geniş yayılmış səhv isə dəyərsizləşdirmədir. Şişirtmə, dram yaratma kimi ifadələr bəzən gözlənildiyindən də ağır təsir edir və insanı içdən yaralayır.
Psixoloqlar izah edir ki, dəyərsizləşdirmə münasibətdə təhlükəsizlik hissini məhv edir. İnsan artıq hisslərini bölüşmək istəmir, çünki yenə lağlağı və ya istehza eşitməkdən qorxur.
Mütəxəssislər həmçinin nəzarətin də böyük rol oynadığını qeyd edirlər. Hər şeyi bilmək, yoxlamaq, daim izləmək istəyi münasibəti sevgi yox, azadlıq uğrunda mübarizəyə çevirir.
Ekspertlərin fikrincə, nəzarət çox vaxt qorxudan doğur. Amma bu qorxu etibarı möhkəmləndirmir, əksinə onu yavaş-yavaş məhv edir.
Cütlüklər bəzən unudurlar ki, etibar kor-koranə inanmaq deyil, sərhədlərə hörmət etməkdir. Bu sərhədlərin pozulması isə insanları bir-birindən uzaqlaşdırır və soyuqluq yaradır.
Psixoloqlar ünsiyyət tərzinə də diqqət yetirməyi tövsiyə edirlər. Bəzən problem deyilən sözlərdə yox, həmin sözlərin hansı tonla deyilməsində olur.
Araşdırmalar göstərir ki, etibarı qorumaq onu sonradan bərpa etməkdən daha asandır. Amma bir çox insan etibar uğrunda mübarizəyə çox gec başlayır.
Ekspertlər əmindir ki, etibar insanların bir-birinə qarşı “müttəfiq” olmağı dayandırdığı yerdə yox olur. Onu geri qaytarmaq isə yalnız dürüstlük və qarşılıqlı hörmət sayəsində mümkündür.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
