ADU və Qazaxıstan universiteti arasında niyyət məktubu imzalanıb

ADU-nun mətbuat xidmətindən Lent.az-a verilən məlumata görə, institutun prorektoru Qazaxıstanın Abilayxan adına Beynəlxalq Münasibətlər və Dünya Dilləri Universitetinin Şifahi və Yazılı Tərcüməçilərin Hazırlığı üzrə Beynəlxalq Konsorsium forumunda iştirak edib.

Forumda ADU ilə Qazaxıstanın Beynəlxalq Münasibətlər və Dünya Dilləri Universiteti arasında ayrıca niyyət məktubu imzalanıb. Niyyət məktubuna əsasən, müəllim-tələbə mübadiləsi, birgə konfransların keçirilməsi və s. nəzərdə tutulub.

Qeyd edək ki, Qazaxıstanın Abilayxan adına Beynəlxalq Münasibətlər və Dünya Dilləri Universiteti Frankafoniya Universitetlər Agentliyinin qrantını alıb. Bu qrant əsasında həyata keçiriləcək layihədə Fransanın Strasburq Universitetinin Beynəlxalq Münasibətlər və Tərcümə fakültəsi, Türkiyənin Hacettepe Universitetinin Tərcümə fakültəsi və Azərbaycan Dillər Universitetinin Tərcümə fakültəsi tərəfindən Qazaxıstanın Abilayxan adına Beynəlxalq Münasibətlər və Dünya Dilləri Universitetinin Tərcümə fakültəsində gedən islahatlara dəstək verilməsi nəzərdə tutulub. Hər 3 universitet Qazaxıstan Universitetinin Tərcümə fakültəsində aparılan islahatlara kömək etmək məqsədilə təcrübə mübadiləsi aparacaq, bu universitetlərin müəllimləri Qazaxıstan universitetində təlim keçəcəklər.

Səfər zamanı Qazaxıstanın Abilayxan adına Beynəlxalq Münasibətlər və Dünya Dilləri Universitetinin rektoru Səlimə Kunanbayeva qonaqları qəbul edib və ADU-ya Qazaxıstanın Ablayxan adına Universitetinin “Şifahi və Yazılı Tərcüməçilərin Hazırlığı üzrə Beynəlxalq Konsorsium forumunda iştirakına görə sertifikat verib.