İranın vitse-prezidenti “soyqırım” ifadəsindən imtina etdi

İranın vitse-prezidenti Hmid Baqai Tehranda keçirdiyi mətbuat konfransı zamanı “erməni soyqırımı” ifadəsini işlətmədiyini bildirib. Lent.az-ın “Zaman” qəzetinə istinadən verdiyi məlumata görə, Baqai bəzi KİV-lərin səhvən həmin ifadəni onun ayağına yazdıqlarını bildirərək, səhvin dərhal düzəldilməsini tələb edib.

Vitse-prezident bu səhvi hansı ölkənin KİV-nin yaydığının fərqin olmadığını vurğulayıb: “Biz səhvin düzəldilməsini tələb edirik. Biz gözləyirik ki, bəyanatımız dərc olunacaq. Bəyan edirik ki, onlar səhvə yol veriblər”.

Xatırladaq ki, İranın “İRNA” agentliyi Baqainin ötən həftə “İran: Qələbə körpüləri” elmi konfransında çıxışı zamanı “100 il öncə Osmanlı hökuməti ermənilərin bir qisminə qarşı soyqırım həyata keçirib” dediyini iddia edib. Bundan sonra Türkiyə xarici işlər naziri Əhməd Davudoğlu rəsmi İrandan vitse-prezidentin bəyanatı ilə bağlı açıqlama tələb edib.