Çinə “üçbaşlı əjdaha” hücum çəkir

Çinin sahil rayonları dənizdə birləşmiş 3 güclü qasırğanın dağıdıcı təsirinə məruz qalacaq.

Lent.az-ın “Rosbalt” agentliyinə istinadən verdiyi məlumata görə, avqustun 29-da Cənubi Çin dənizinin şimal hissəsində “Aslanağızlı” dağ adlı qasırğa, avqustun 30-da Sakit okeanın şimal-qərbində “Kompas” qasırğası yaranıb.

Bu gün səhər saatlarında isə “Cənub axını” qasırğası Futszyan əyalətində dağıntılar törədib və daha sonra okean üzərində digər iki qasırğa ilə birləşərək “üçbaşlı əjdaha” yaradıb. “Üçbaşlı əjdaha” Çin sahillərinə doğru hərəkət edir. Yaxın 3 gündə Çinin cənub-şərq sahillərini leysan yağışlarla müşahidə olunan güclü küləyin dağıdıcı təsirinə məruz qalacağı proqnozlaşdırılır.

Çin hökuməti yaxın 3 gündə gözlənən təhlükə ilə bağlı bir neçə əyalətin sakinlərinə xəbərdarlıq edib.