Moskva milisində cinsi təcavüz faktı...

Moskva Şəhər Daxili İşlər İdarəsinin rəis müavini, polkovnik Aleksandr Telitsa tabeçiliyindəki milis işçilərinin zorlama əməlinə yol verdikləri üçün işdən azad edilib. Lent.az-ın “Exo Moskvı” radiosuna istinadən verdiyi məlumata görə, avqustun 31-də gecə saatlarında Moskvanın Volqoqrad prospektində 3 milis əməkdaşı Belarus vətəndaşı olan bir gənc qadını zorla başqa bir milis əməkdaşının mənzilinə gətiriblər.

Gecə ərzində milis əməkdaşları qadını zorlayıblar, sentyabrın 1-də də onu zorla evdə saxlamağa davam ediblər. Sentyabrın 1-də gecə qadın mənzildən qaçmağı bacarıb və milisə zəng açıb. Mənzilə gələn milis əməkdaşları burada həmməsləkləri ilə rastlaşıb.

Zorlamaya yol vermiş milis əməkdaşlarının 1-i hadisə yerindən qaçıb, 2-i isə ələ keçib. Onları 6 ilə yaxın azadlıqdan məhrumetmə cəzası gözləyir.

Qeyd edək ki, bu, Moskvada milisin törətdiyi yeganə cinayət əməli deyil. Ötən şənbə də 4 milis əməkdaşı 1 nəfəri oğurlamaqda günahkar sayılaraq saxlanılıb.