Çin Yaponiyadan üzr və kompensasiya tələb etdi

Pekin Şərqi Çin dənizində balıqçı gəmisinin kapitanının həbsi ilə bağlı Yaponiyanın üzr istəməsini və kompensasiya ödəməsini tələb edir. Lent.az-ın “Sinxua” agentliyinə istinadən verdiyi məlumata görə, Çin Xarici İşlər Nazirliyi bu gün belə bəyanatla çıxış edib.

Bəyanatda qeyd olunur ki, gəmi kapitanının və digər heyət üzvlərinin həbsi yapon hökumətinin Çinin suverenliyin əl uzatmaq və vətəndaşlarının hüququnu pozmaqdır. Ancaq Yaponiya hökuməti balıqçı gəmisinin və onun kapitanının həbsi ilə bağlı Pekindən üzr istəməyi və kompensasiya ödəməyi rədd edib. Yaponiya Prokurorluğu bildirib ki, Çin balıqçı gəmisi ilə toqquşma zamanı yapon gəmisinə az zərər dəydiyi və xəsarət alanlar olmadığı, Çin balıqçı gəmisinin kapitanının hərəkəti qərəzli xarakter daşımadığı üçün kapitanın azadlığa buraxılması barədə qərar verilib.

Çin balıqçı gəmisinin kapitanı Çjan Tsisyun isə bu gün səhər təyyarə ilə Yaponiyadan Fuçjou şəhərinə gətirilib. Gəmi kapitanını Çin Xarici İşlər Nazirliyinin köməkçisi Xu Çjenyue və qohumları qarşılayıblar. O, ilk növbədə azadlığa buraxılması üçün səy göstərən Çin hökumətinə və həmvətənlərinə minnətdarlıq edib.

Qeyd edək ki, Yaponiya hərbi patrul gəmisi sentyabrın 7-də Dyaoyuydao adası yaxınlığında Çin balıqçı gəmisi ilə toqquşub. Balıqçı gəmisi saxlanılıb, sentyabrın 8-də isə gəmi kapitanı həbs olunub. Bu olay Çin və Yaponiya arasında münasibətlərin pisləşməsinə yol açıb.