“Qarabağ” Farer adalarında oyun günü də məşq edəcək

Avropa Liqasının II təsnifat mərhələsinin ilk oyununda Farer adalarının “Streymur” klubunun qonağı olacaq “Qarabağ” komandası bir sutkalıq yolçuluqdan sonra matçın keçiriləcəyi Torshavn şəhərinə çatıb. Lent.az-ın Ağdam klubunun rəsmi saytına istinadən verdiyi məlumata görə, ağdamlılar dünən səhər saatlarında Bakı – İstanbul – Torshavn reysi ilə yola çıxıblar.

Artıq Farer adalarında olan Azərbaycan təmsilçisi iyulun 13-də ilk səfər məşqinə çıxıb. Yerli vaxtla saat 12:00-dan (Bakı vaxtı ilə saat 16:00) etibarən “Qarabağ” oyunun keçiriləcəyi “Qundadalur” stadionunda hazırlığa başlayıb. Amma bu, baş məşqçi Qurban Qurbanovun komandasının son məşqi olmayacaq. Sabah oyunqabağı yerli vaxtla saat 11:30-da da “Qarabağ” məşq edəcək.

Qeyd edək ki, “Streymur” – “Qarabağ” matçı iyulun 14-də saat 23:00-da başlanacaq.