Alimlər ilk dəfə qoz qabığından su-elektrik generatoru hazırladılar

Alimlər ilk dəfə qoz qabığından hazırlanmış və su ilə üzvi materialın qarşılıqlı təsirindən elektrik enerjisi istehsal edə bilən su-elektrik generatoru layihələndiriblər.

Lent.az xəbər verir ki, tədqiqatın nəticələri “Energy & Environmental Materials” jurnalında dərc olunub.

Tədqiqatçılar badam, fındıq, pekan və qoz qabıqlarını istifadə ediblər. Bu qabıqlar mikrokanallar və hidrofilik qruplarla zəngindir. Su ilə təmasda olarkən bu mikrokanallar hidrovoltaj effekti yaradır və bu, buxarlanma və kapilyar qüvvələrin təsiri ilə ionların hərəkətinə səbəb olur. Nəticədə elektrik cərəyanı yaranır. Qoz qabığından hazırlanmış cihaz sabit 600 mV-dan yüksək gərginlik və 5,9 μVt/sm²-dən çox güc sıxlığı nümayiş etdirib və bir həftə boyunca işləyib.

Xüsusi işlənmə prosesindən sonra elektrik gücü artıb və gərginlik 1,21 V-a çatıb, maksimum cərəyan sıxlığı isə 347,2 μA/sm²-ə yüksəlib. Bu da əksər üzvi və qeyri-üzvi analoqlardan yüksəkdir. İki belə cihaz birləşdirildikdə əlavə elektrik enerji çeviriciləri olmadan LCD kalkulyatoru işlədə bilib.

Müəlliflərin sözlərinə görə, bu texnologiya göstərir ki, adi qoz qabığı kimi bir çox kənd təsərrüfatı tullantıları kiçik elektron cihazların enerji təminatını üçün əlçatan edə və ekoloji təmiz enerji mənbəyinə çevrilə bilər. Gələcəkdə bu generatorlar rütubət, yağış suyu və hətta dəniz suyundan istifadə edərək davamlı energetika sahəsində yeni imkanlar aça biləcək.