Geriyə yerimək, qırmızı geyinmək olmaz - Eşitmədiyiniz BATİL İNANCLAR

Əldən-ələ qayçı və ya bıçaq verməmək, gözəl bir şeydən danışarkən taxtaya vurmaq və ya dilini dişləmək, körpə görəndə gözəlliyinə nəzər dəyməsin deyə ona “çirkin” demək…Əgər sizin də belə bağlı olduğunuz batil inanclar varsa, özünüzü əsla tək hiss etməyin. Çünki süni intellekt dövründə belə, dünyanın dörd bir yanında hələ də öz aktuallığını qoruyan batil inanclar mövcuddur!

Lent.az xəbər verir ki, insanlıq tarixinin çox qədim zamanlarında, elm və texnologiya bu qədər inkişaf etmədiyi vaxtlarda insanlar həyatı təbiətə baxaraq anlamağa çalışırdılar. Gündəlik həyatda qarşılarına çıxan bəzi halları təbiətdəki müəyyən qüvvələrlə əlaqələndirir və bu yolla baş verən hadisələri izah etməyə cəhd göstərirdilər.

Bu cəhdlər bəzən həyatı asanlaşdırsa da, bəzən zaman keçdikcə heç bir real əsası olmayan batil inancların yaranmasına səbəb oldu. Üstəlik, bu inanclar yalnız bizim mədəniyyətimizə məxsus deyil... Dünyanın bir çox yerlərində insanlar hələ də bəzi batil inanclara sıx-sıxı bağlanırlar.

Onlardan bəziləri isə belədir:

Hindistanda gecə dırnaq kəsmək uğursuzluq sayılır. İnanclara görə, gecə dırnaq kəsildikdə həm pis ruhlar çağırılır, həm də ailə daxilində mübahisələr baş verə bilər.

Rusiyada qapı astanasında əl sıxmağın uğursuzluq gətirəcəyinə inam var. Çünki qapı astanası yaşamla ölüm arasındakı sərhəd kimi qəbul edilir.

Güzgünün sınması bir çox mədəniyyətlərdə də uğursuzluqla əlaqələndirilir. Məsələn, İtaliya və ABŞ-da güzgünün sınmasını görmək, insanın qarşıdakı 7 il ərzində uğursuzluq yaşayacağına işarə sayılır. Bu cəmiyyətlər güzgünün ruhun əksini daşıdığına inanırlar. Ona görə də güzgünün sınması pis şansla bağlanır.

Bir evin damında bayquş ötəndə, bizim mədəniyyətimizdə də bu, yaxşı əlamət kimi qarşılanmır. İngiltərə və ABŞ-da isə bu inanc birbaşa quşlarla əlaqələndirilir. Əgər İngiltərə və ABŞ-da bir quş evin damına qonarsa, bu, ölümün işarəsi kimi qəbul edilir. Burada xüsusilə ön plana çıxan quşlar qarğalar və bayquşlardır.

Çində 4 rəqəmi ölüm ilə əlaqələndirilir və buna görə də uğursuz sayılır. Bu inanc o qədər geniş yayılıb ki, ölkədə bir çox binalarda 4-cü mərtəbə heç vaxt nömrələnmir.

Rusiyada boş şüşələri yerə qoymaq və ya masadan almaq olmaz, çünki bunun oradakı insanlara kasadlıq gətirəcəyinə dair inanc var. Evdəki bərəkətin itməməsi üçün bu inanca sadiq qalırlar.

Almaniyadakı ən qəribə batil inanclardan biri isə su ilə badə qaldırmamaqdır. Əgər dostlarınızın ölməsini istəmirsinizsə, əsla su ilə qədəh qaldırmamalısınız. Çünki inanca görə, su ilə qədəh yalnız ölülər üçün qaldırılır.

İspaniyada insanların heç nə etmək istəmədiyi gün çərşənbə axşamıdır, çünki yerli ənənəyə görə bu gün uğursuzdur. İspanlar həftənin ikinci günləri mühüm işlər görməzlər, hətta evlənmək üçün belə başqa bir günü seçərlər.

Fransada məşhur baqet çörəyini masanın üzərinə tərs qoysanız, fransızların reaksiyası ilə qarşılaşa bilərsiniz. Çünki inanca görə, çörəyi tərs qoymaq uğursuzluq gətirir. Bu batil inancın tarixi də var: çox qədim zamanlarda cəlladlara ayrılan çörəklər masanın üzərinə məhz tərs qoyularmış...

Filippinlərdəki batil inanclar olduqca maraqlıdır. Məsələn, əgər hava fırtınalıdırsa, küçədə qırmızı geyimli heç kəsi görə bilməzsiniz. Çünki inanclara görə, qırmızı rəng ildırımı özünə çəkir.

Cənub ölkələrindən başqa bir maraqlı batil inanc isə İtaliya və Portuqaliyadadır. Bu ölkələrdə arxa-arxaya yerimək uğursuzluq sayılır. İnanclara görə, geri addımlamaq ruhları narahat edir və insanın həyatında bəzi şeylərin də geriyə doğru getməsinə səbəb ola bilər.