Yadplanetlilərdən gələn siqnalların necə qəbul ediləcəyi tapıldı

Yeni bir araşdırma çərçivəsində alimlər bəşəriyyətin yadplanetli ağılın izlərini harada axtarmalı olduğunu anlamağa çalışıblar.

Lent.az xarici mediaya istinadən xəbər verir ki, bunun üçün onlar insanların göndərdiyi və başqa bir sivilizasiya tərəfindən aşkar oluna biləcək siqnalları təhlil ediblər. Bu, bizə uzaq yadplanetli dünyalardan hansı oxşar siqnalların gələ biləcəyini anlamağa kömək edə bilər.

“İnsanlar əsasən Mars kimi digər planetləri öyrənmək üçün göndərdiyimiz kosmik gəmilər və zondlarla əlaqə saxlayır”, - Pensilvaniya Ştat Universitetinin Eberli Elmlər Kollecindən Pinçen Fan bildirib.

“Amma Mars kimi planet bütün ötürməni bloklamır, buna görə də uzaq bir kosmik gəmi və ya həmin planetlərdən biri ilə eyni xətt üzərində yerləşən başqa bir planet bu siqnalların sızmasını potensial olaraq aşkar edə bilər.

Bu, Yerin və Günəş sistemindəki başqa bir planetin onların baxış bucağında düzülməsi zamanı baş verəcək. Bu da onu göstərir ki, yadplanetli mesajlar axtararkən Günəş sistemindən kənardakı planetlərin düzülməsinə diqqət etməliyik”, - alim izah edib.

Yer kürəsindən yayılan ən güclü və uzunmüddətli siqnalların çoxu bizdən kosmik aparatlar üçün göndərilənlərdir. Bu işin böyük hissəsi NASA-nın uzaq kosmosla əlaqə şəbəkəsi vasitəsilə həyata keçirilir - Yerdən çox uzaqda yerləşən kosmik aparatlar arasında əlaqəni təmin edən yerüstü obyektlər kompleksi.

Alimlər bu şəbəkənin qeydlərini kosmik aparatların yerləşmə məlumatları ilə tutuşduraraq, radiodalğaların Yer kürəsindən nə vaxt və hara göndərildiyini anlamağa çalışıblar.

Onlar müəyyən ediblər ki, siqnalların çoxu Mars yaxınlığındakı kosmik aparatlara yönəldilib. Digərləri isə əsasən digər planetlərə və ya Günəşlə Yer arasında yerləşən Laqranj nöqtələrinə göndərilib; burada iki obyektin cazibə qüvvəsi kosmik obyektlərin sabit vəziyyətdə qalmasına kömək edir.

Bu o deməkdir ki, yadplanetli kosmik aparatlardan gələn siqnalları axtarmaq üçün ən yaxşı yerlər planetlərin düzülmə nöqtələridir. Alimlər artıq planetlərin düzülməsindən başqa dünyaları tapmaq üçün istifadə edirlər: planetlər öz ulduzlarının qarşısından keçərkən, Yerdən müşahidə olunan işıq intensivliyinin kiçik azalması onların aşkar olunmasının açarıdır.

“Lakin biz yalnız son 10–20 ildə çoxlu ekzoplanetlər aşkar etməyə başlamışıq, buna görə də iki və ya daha çox tranzitli ekzoplaneti olan sistemlər barədə çox şey bilmirik. NASA-nın Nancy Grace Roman kosmik teleskopunun gələcəkdə istifadəyə verilməsi ilə yüz min əvvəllər aşkarlanmamış ekzoplanetin kəşfini gözləyirik. Bu səbəbdən də potensial axtarış sahəmiz əhəmiyyətli dərəcədə genişlənməlidir”, - deyə Fan bildirib.