Nazirlik Corat bələdiyyəsinə 700 manat cərimə kəsdi

Ekologiya və Təbii Sərvətlər Nazirliyi və Daxili İşlər Nazirliyinin əməkdaşları ilə birgə Sumqayıt şəhərinin Xəzər sahili ərazilərində bərk məişət tullantılarının idarə olunması vəziyyətini yoxlamaq məqsədilə reydlər keçirib. Artıq yoxlama-reydlərin nəticələri də məlumdur.

Ekologiya və Təbii Sərvətlər Nazirliyinin mətbuat xidmətindən Lent.az-a bildiriblər ki, Sumqayıt-Novxanı dənizkənarı yolunun sağ hissəsində, S.Əliyev və Sahil küçələri ərazilərində tullantıların qalaqlanması və yandırılmasına görə Corat bələdiyyəsi hüquqi şəxs qismində inzibati qaydada 7000 manat məbləğində cərimə olunub. Həmçinin eyni səbəb üzündən Sumqayıt şəhər Təmizlik Departamenti MMC də 7000 manat məbləğində cərimələnib.

Reydlər zamanı məlum olub ki, təkcə iri müəssisələr yox, ictimai iaşə xidməti göstərən fiziki şəxslər də Xəzəri çirkləndirir. Bu səbəbdən bir neçə xidmət sahəsinin - “Səma”, “Əl-Əmrah” , “Sahil-1”, “Mirvari”, “Uğur”, “Pəribulağı” iaşə obyektlərinin iş icraçılarına 500 manat məbləğində cərimə kəsilib.

Elxan SALAHOV