Ermənistanda qəzet redaktoru polisi döyməkdə günahlandırılır

Ermənistanın Baş Prokurorluğu müxalif yönümlü “Aykakan jamanak” qəzetinin redaktoru Nikol Paşinyana qarşı ittiham irəli sürüb.

Lent.az-ın “Panarmenian.am” saytına istinadən yaydığı məlumata görə, redaktor 2008-ci ilin martında, Ermənistanda prezident seçkilərindən sonra baş verən iğtişaşlar zamanı polis əməkdaşlarına qarşı zorakılıq törətməkdə günahlandırılır.

Baş Prokurorluq xatırladıb ki, hələ 2007-ci il 23 oktyabrda da Nikol Paşinyan polis əməkdaşına sağlamlıq üçün təhlükəli olmayan xəsarət yetirib.

Avqustun 4-də redaktor barəsində qaldırılan cinayət işi 2008-ci ilin martında baş verən kütləvi iğtişaşlarla bağlı işdən ayrılıb və işə ayrılıqda baxılmağa qərar verilib. Avqustun 5-də Nikol Paşinyan və vəkilinə bu barədə xəbər verilib və onlar materiallarla tanış olublar.

Qeyd edək ki, Nikol Paşinyan 2008-ci ilin mart hadisələrindən sonra axtarılsa da, gizlənib. Bu il iyulun 1-də isə hüquq-mühafizə orqanlarına könüllü təslim olub. Hazırda paytaxtdakı "Kentron" təcridxanasında saxlanılır.