İranda 8 PKK terrorçusu öldürülüb

İran təhlükəsizlik qüvvələri PKK terror təşkilatının qolu olan PJAK-a qarşı Soma və Dizli bölgələrində geniş miqyaslı əməliyyat keçirib.

Lent.az-ın “haberturk.com” saytına istinadən verdiyi məlumata görə, əməliyyatlar zamanı “Şervan” kod adlı Zahir Mistevehi, “Rubar” kod adlı Ramazan Güngözü, “Latif” kod adlı Ali Heyderiyan, “Şerko” kod adlı Mustafa Eylüyi, “Zinar” kod adlı Şehriya Nevidihezayi, “Rüstem” kod adlı Mesut Letsorhi, “Ferhat” kod adlı Hüseyn Letifi, “Seyit” kod adlı Sami Hüseyn adlı terrorçular öldürülüb.

2 terrorçu isə təslim olub. İran-Türkiyə sərhəd bölgəsində terror təşkilatının maliyyələşməsi üçün narkotik vasitə ticarəti ilə məşğul olduqları müəyyənləşdirilən Rıdvan A., Erol B., Yasin B., Şaban A., Taner A., Bedrettin K., Sinan Y., Salih Y., Siracettin Y., Özcan Y., Hasan Abdullah H. və Muhtar Hoşment adlı şəxslər də yaxalanıblar. Xoy, Kaleli həbsxanalarında saxlanılan 12 PJAK üzvünün edam ediləcəyi bildirilib.

Dünəndən İran ordusuna məxsus artilleriya qurğularından Şimali İraqdakı Qəndil dağına zərbələr endirilir. Bu dağda PKK/PJAK terror təşkilatının bazaları yerləşir.