Məhkumdan 600 qram heroin götürülüb - FOTO

Azərbaycan Respublikası Ədliyyə nazirliyinin Penitensiar xidməti cəzaçəkmə müəssisələri və istintaq təcridxanalarındakı şəxslərə qadağan olunmuş əşyaların verilməsi və ötürülməsi, həmçinin belə əşyaların həmin yerlərdə dövriyyəsi ilə bağlı əməliyyat həyata keçirib.

Lent.az-ın Penitensiar Xidmətin İctimaiyyətlə Əlaqələr Şöbəsinə istinadən verdiyi məlumata görə, Penitensiar Xidmətin əməliyyat aparatı tərəfindən keçirilən əməliyyat tədbiri zamanı 6 saylı cəzaçəkmə müəssisəsində külli miqdarda narkotik aşkarlanıb.

09.10.2010-cu il tarixdə Penitensiar Xidmətin və tabelikdə olan 6 saylı cəzaçəkmə müəssisəsinin əməliyyat aparatları həmin müəssisədə cəza çəkən, Azərbaycan Respublikası Cinayət Məcəlləsinin 178.3.2; 320.1; 320.2 və 66.3 maddələri ilə təqsirli bilinərək 6 il müddətinə azadlıqdan məhrum edilmiş 1980-ci il təvəllüdlü məhkum Teymurov Zaur Tahir oğluna məxsus olan və məişət mebelinin hazırlanması üçün nəzərdə tutulan taxta parçasının içində (gizli saxlanc yerində) xalis çəkisi 600 qram olan narkotik vasitə - heroin aşkarlanaraq götürülüb. Faktla bağlı araşdırma aparılır.