Toydan qayıdan qohumlar qəzaya düşdü: 3 ölü, 2 yaralı

Rayonun Dağlı və Küsnət kəndləri arasındakı yolda “Qaz 24” markalı avtomaşın hərəkətsiz vəziyyətdə olan “Qaz 66” markalı avtomaşınla toqquşub.

Qəza nəticəsində “Qaz 24”-də olan 5 nəfərin hamısı ağır bədən xəsarətləri ilə Quba Mərkəzi rayon Xəstəxanasına çatdırılıb. Həkimlərin səyinə baxmayaraq, 3 nəfərin həyatını xilas etmək mümkün olmayıb. Dağlı kənd sakinləri Nafiq Vəlimuradov, İdrət Baxışov və Vahid Şıxverdiyev vəfat edib. 52 yaşlı Qəçrəş kənd sakini Lalə Tapdıqova və onun 4 yaşlı nəvəsi Qurban Tapdıqovun vəziyyəti isə ağırdır.

Quba MRX-dan Lent.az-a verilən məlumata görə, xəstələrin vəziyyəti ağır olduğu üçün paytaxtdan həkim briqadası çağırılıb.

Quba rayon polis şöbəsindən Lent.az-a verilən məlumata görə, qəzaya yüksək sürət və sürücünün avtomaşını sərxoş vəziyyətdə idarə etməsi səbəb olub.

Qeyd edək ki, “Qaz 24”-də olan şəxslər Yuxarı Küsnət kəndindən toy məclisindən qayıdırmışlar.

Faktla bağlı Quba RPŞ-də araşdırmalar davam etdirilir.

Vəli Turan