Gürcüstanda bir azərbaycanlı öldürülüb, digəri ağır yaralanıb

APA-nın Gürcüstan bürosunun xəbərinə görə, hadisə dünən saat 18.00 radələrində rayonun Şindilər kəndində qeydə alınıb.

Kənd sakinlərinin APA-ya verdiyi məlumata görə, Dmanisi şəhəri yaxınlığında yerləşən Svan qəsəbə sakini İrakli Libiliyani ilə Şindilər kənd sakinləri - 83 yaşlı Muhəddin Adıgözəlov və 70 yaşlı Nadir Əhmədov arasında mübahisə yaranıb. İ. Libiliyani hər iki şəxsə dəmir parçası ilə ağır xəsarətlər yetirib. M. Adıgözəlov başından aldığı xəsarətlər nəticəsində hadisə yerində dünyasını dəyişib. N. Əhmədov isə ağır vəziyyətdə Tiflisdəki xəstəxanalardan birində reanimasiya şöbəsinə yerləşdirilib.
İ. Libiliyani tutulub. Faktla bağlı araşdırmalar aparılır. Hadisə yerinə rayon rəhbərliyi gəlib.

Məlumata görə, hadisə M. Adıgözəlov və N. Əhmədov İ. Libiliyaninin Şindilər kəndindəki əkin sahəsində mal-qara otaran zaman baş verib. İ. Libiliyani kənd sakinlərinin mal-qarasının əkin sahəsində otlamasından qəzəblənərək, heyvanlara xəsarət yetirməyə başlayıb. Daha sonra o, buna etiraz edən M. Adıgözəlov və N. Əhmədova hücum edib.