Bakı-Qazax yolunda ağır qəza: 1nəfər ölüb, 2 nəfər yaralanıb

Baş Dövlət Yol Polisi İdarəsinin (BDYPİ) istintaq və təhqiqat şöbəsinin müstəntiqi Mahmud Maqsudov APA-nın yerli bürosuna bildirib ki, hadisə noyabrın 14-də saat 8:30 radələrində magistral yolun 242-ci kilometrliyində, Ucarın Alpoud kəndi ərazisində qeydə alınıb. Məlumata görə Sumqayıtın Corat qəsəbəsində yaşayan 1987-ci il təvəllüdlü Vəliyev Arif Tahir oğlunun idarə etdiyi 50-CD-354 dövlət nömrə nişanlı “VAZ 2107” markalı minik avtomobili qarşı tərəfdən gələn Tərtərin Qapanlı kənd sakini 1979-cu il təvəllüdlü Süleymanov Elman İbrahim oğluna məxsus 10 LJ 387 dövlət nömrə nişanlı “VAZ 2102” markalı avtomobillə toqquşub. Hadisə nəticəsində hər iki avtomobilin sürücüsü və sərnişinlər-1967-ci il təvəllüdlü Vəliyev Tahir İsaxan oğlu və 1949-cu il təvəllüdlü Quliyev Qəmbər İsa oğlu müxtəlif dərəcəli bədən xəsarətləri ilə Ucar Mərkəzi Rayon Xəstəxanasına yerləşdirilib. “VAZ 2107” nin sahibi, avtomobili idarə edən sürücünün atası Tahir Vəliyev xəstəxanada dünyasını dəyişib.
Faktla bağlı BDYPİ-nin istintaq və təhqiqat şöbəsində cinayət işi açılıb, araşdırma aparılır.