Dağıstanlı zəvvarların mikroavtobusu Azərbaycanda qəzaya uğrayıb

Daxili İşlər Nazirliyinin (DİN) Baş Dövlət Yol Polisi İdarəsinin (BDYPİ) istintaq-təhqiqat şöbəsindən APA-nın Cənub bürosuna verilən məlumata görə, hadisə dekabrın 9-da saat 16.40 radələrində Ələt-Astara magistralının 205-ci kilometrliyində - Astara rayonunun Telman kəndi ərazisində qeydə alınıb. Dağıstan Respublikasının vətəndaşı, 1973-cü il təvəllüdlü Məhəmmədşakir Kərimovun idarə etdiyi və içərisində Məkkə ziyarətindən qayıdan hacıların olduğu “Qazel” markalı mikroavtobus Lənkəran rayon sakini, 1982-ci il təvəllüdlü Ceyhun Dadaşovun idarə etdiyi “QAZ-24” markalı avtomobillə toqquşub. Zərbənin təsirindən “QAZ -24” markalı avtomobil Dağıstan Respublikasının vətəndaşı, 1963-cü il təvəllüdlü Məhəmmədşakir Musayevin idarə etdiyi “Prado” markalı avtomobilə çırpılıb. Hadisə zamanı xəsarət alan olmasa da, hər üç avtomobilə ciddi ziyan dəyib. Hadisəyə avtomobillərin sürət həddini aşmasının səbəb olduğu bildirilir. Faktla bağlı araşdırma aparılır.