Azərbaycanda polis rəisi məhkəməyə verildi - SƏBƏB

Siyəzən rayon Polis Şöbəsinin İstintaq Bölməsinin rəisi məhkəməyə verilib.

Lent.az-ın məlumatına görə, polis kapitanı Bədirşah Vəlimətov barəsində İnzibati Xətalar Məcəlləsinin 529.3-cü (Yol hərəkəti qaydaları əleyhinə olan inzibati xətaların, yaxud bu Məcəllənin 353.2-ci maddəsində nəzərdə tutulan inzibati xətanın törədilməsinə görə inzibati cərimə növündə inzibati tənbeh tətbiq etmə haqqında qərarın qanuni qüvvəyə mindiyi gündən 3 ay müddətində qanunla müəyyən edilmiş əsaslar olmadan icra edilməməsinə görə) maddəsi ilə protokol tərtib olunub.

Protokol baxılması üçün Xaçmaz rayon Məhkəməsinə göndərilib. İş hakim Xıdır Quliyevin icraatına verilib.

Qeyd edək ki, həmin maddə əsasında polis kapitanının nəqliyyat vasitəsini idarə etmək hüququ altı aydan bir ilədək müddətə məhdudlaşdırıla bilər.

Xatırladaq ki, B. Vəlimətov bu ilin mart ayında daxili işlər nazirinin əmrilə həmin vəzifəyə təyin olunub.