Son səkkiz ay ərzində Aydında baş verən ayrı-ayrı hadisələrdə beş Adnan Menderes Universiteti tələbəsinin ölümü geniş narahatlıq doğurub.
Lent.az-ın Türkiyə KİV-nə istinadla xəbərinə görə, motosiklet qəzasında həlak olan Sıla Karabacak və Səlim Ateşin, sinəsindən güllə yarası alan Büşra Cinin, evində ölü tapılan Melisa Şengülün və meşəlik ərazidə başından güllə yarası alan Teslime Hanedanın ölümü şəhərdə "ADU-da nə baş verir?" sualını gündəmə gətirib.
Mayın 9-da Kənd təsərrüfatı fakültəsinin tələbələri 24 yaşlı Səlim Ateş və 20 yaşlı Sıla Karabacak Koçarlıdan Aydın şəhər mərkəzinə qayıdarkən yarış motosikleti ilə traktorun toqquşması nəticəsində həlak olublar.
24 yaşlı Büşra Cin martın 30-da Nazillidə sinəsindən güllələnmiş vəziyyətdə tapılıb və sevgilisi Özcan Korkmaz onun ölümündə şübhəli bilinərək həbs edilib. İşin vacib elementləri arasında cinayət hesabatları, silah izləri və DNT sübutları, eləcə də Korkmazın "Hər şey bitdi, Büşra..." mesajı var.
Noyabrın 11-də Efelerdə dostları ilə içki içən 19 yaşlı Melisa Şengül yatağında ölü tapılıb. Onun üzərində heç bir xəsarət əlaməti aşkar edilməyib və enerji içkiləri ilə spirtli içkinin qarışdırılması ehtimalı araşdırılır. Ölümün dəqiq səbəbi autopsiyanın nəticələri ilə müəyyən ediləcək.
Avqustun 7-də meşədə başından güllələnmiş vəziyyətdə tapılan 20 yaşlı Teslime Hanedanın ölümü əvvəlcə intihar kimi qiymətləndirilib. Lakin sevgilisi Efehan Fidanın həbsi və Teslimenin evində tapılan əlyazma məktub istintaqı daha da dərinləşdirib. Aydına gəldikdən sonra narkotik asılılığı, kuryer kimi işləmək və zorakılıq kimi hadisələri təsvir edən məktub, bunun qətl olduğuna dair şübhələri artırıb.
Beş tələbənin bir-birinin ardınca ölümü universitet tələbələri və onların ailələri arasında ciddi narahatlığa səbəb olub. Şəhərdə tez-tez "ADU-da nə baş verir?" sualını verməyə başlayıblar. Hər bir iş üzrə araşdırmalar davam edir. Hakimiyyət orqanları bildirir ki, hadisələrin bir-biri ilə əlaqəsi olub-olmadığını müəyyən etmək üçün bütün işlər diqqətlə araşdırılır.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
