“Barselona” Messisiz də “Barsa”dır

“Barselona” İspaniya Kubokunun 1/8 final matçının cavab görüşündə “Kordoba”nın qapısından 5 cavabsız top keçirib. Lent.az-ın məlumatına görə, “Nou Kamp” da keçirilmiş oyunda David Vilya (21 və 26-cı dəqiqələr) ilə Aleksis Sançes (55 və 85-ci dəqiqələr) “dubl” edib.

Daha bir qolun müəllifi isə Tyaqo Alkantara (17-ci dəqiqə) olub. Bu komandalar arasında ilk matçda da “Barsa” qalib gəlib – 2:0. Həmin vaxt hər iki topu Lionel Messi vurub. Messi cavab oyununu ehtiyatda keçirib.

Qeyd edək ki, ¼ finalda “Barselona” “Malaqa” ilə üz-üzə gələcək. Digər cütlər isə bunlar olacaq: “Real” – “Valensiya”, “Atletiko” – “Betis”, “Saraqosa” – “Sevilya”.