Gədəbəydə bazar yandı: xüsusi komissiya yaradıldı

Azərbaycanın Gədəbəy rayonunun mərkəzi bazarında yanğın baş verib.

Fövqəladə Hallar Nazirliyi Dövlət Yanğından Mühafizə Xidmətinin Gədəbəy rayon Yanğından Mühafizə Hissəsindən APA-nın qərb bürosuna verilən məlumata görə, hadisə bu gün səhər saatlarında baş verib.

”Anar” MMC- yə məxsus mərkəzi bazarın ərazisində ümumi sahəsi 1700 kvadratmetr olan beton tikilinin içərisində piştaxtalar və satış malları olan 700 kvadratmetr sahəsi yanıb.

Gədəbəy rayon Fövqəladə Hallar Komissiyasının sədri Qüdrət Paşayevin dediyinə görə, yanğınla bağlı rayon icra hakimiyyətində xüsusi komissiya yaradılıb və satıcılara dəyən ziyan araşdırılır.

İlkin ehtimala görə yanğına səbəb elektrik naqillərində yaranan qısaqapanma olub.

Hadisə ilə bağlı araşdırma aparılır.