Səhiyyə Nazirliyi: Həkimlərin təzyiqə məruz qalması faktları artır

Azərbaycan Respublikası Səhiyyə Nazirliyi Bakıda həkim və oğlunun bıçaqlanma hadisəsinə rəsmi münasibət açıqlayıb. Lent.az-ın məlumatına görə, rəsmi açıqlamada qeyd olunub ki, son zamanlar tibb işçilərinin və tibbi müəssisələrin aqressiv pasiyentlərin və onların yaxınlarının təcavüzlərinə məruz qalması faktları çoxalıb: “Baş vermiş belə neqativ hallar tibbi fəaliyyətə və səhiyyə ocaqlarının işinə mənfi təsirsiz ötüşmür. Bu da ölkənin tibb müəssisələrində şəfa tapıb, habelə hazırda tibb ocaqlarında öz sağlamlığına qovuşmaq üçün müalicə alan yüzlərlə vətəndaşın haqlı narazılığına səbəb olur. Belə neqativ hallardan biri də mayın 23-də Zabrat qəsəbəsində qeydə alınıb. Oktyabr küçəsi, ev 24 ünvanında yaşayan 3 yaşlı Çiçək Kərimovanın xəstələnməsi ilə əlaqədar sahə həkimi pediatr Lalə Mirzəyevaya çağırış verilib. Həkim xəstəyə KRX diaqnozu qoyaraq, son 2 gün ərzində çağırış ünvanına bir neçə dəfə aktiv olaraq gedib, uşağın vəziyyətini nəzarətdə saxlayıb. Eyni zamanda, valideyn tərəfindən bir neçə dəfə təcili yardıma çağırışlar edilib və təcili yardım tərəfindən ünvana çoxsaylı gedişlər qeyd olunub. Mayın 23-də saat 21 radələrində Nərgiz Kərimova tərəfindən sahə pediatrı Lalə Mirzəyeva ilə telefon vasitəsilə əlaqə saxlayaraq növbəti dəfə evə çağırıb. Sahə pediatrı ünvana gəlib, xəstəni təkrarən müayinə edib. Lakin həkim təyin olunmuş siropu xəstəyə içirərkən Nərgiz Kərimova həkim Lalə Mirzəyevaya bıçaqla kürək nahiyəsindən zərbə endirib. L.Mirzəyeva 3 saylı Şəhər Klinik xəstəxanasına müraciət edib, burada ona ilkin yardım göstərilib. Hazırda müalicəsi davam etdirilir, həkimin vəziyyəti kafidir. Faktla bağlı hüquq mühafizə orqanları tərəfindən araşdırma aparılır”.