Falkao və Ardanın transferinə aydınlıq gəldi

Lent.az-ın məlumatına görə, bu barədə Bakıda səfərdə olan klubun baş meneceri Migel Anxel Gil Marin jurnalistlərə açıqlamasında bildirib.

O deyib ki, mövsümün sonunadək hər iki futbolçu komandada qalacaq: “Arda və Falkao qışda “Atletiko”nu tərk etməyəcəklər. Bunu əminliklə deyə bilərəm”.

Gil Marin son 15 ildə İspaniya çempionu ola bilməmələrinin də səbəbini açıqlayıb. “Atletiko” rəsmisinin fikrincə, İspaniya çempionatında rəqabət çox böyükdür: “Biz “Real Madrid” və “Barselona” ilə rəqabət aparan azsaylı klublardanıq. Digər komandaların da çempion olmaları üçün çox şeylər dəyişilməlidir. Hazırda 7 turdan sonra 19 xalla “Barsa” ilə ilk 2 yeri bölüşürük. Mövsümün sonunadək mövqeyimiz dəyişməsə, söz verirəm ki, gələn ilin iyun-iyul aylarında əsas komandamızı “Bakı” ilə yoldaşlıq görüşünə gətirəcəyik”.

Qeyd edək ki, Radamel Falkao hazırda Lionel Messi və Kriştianu Ronaldu ilə birgə hərəyə 8 qolla İspaniya çempionatının bombardirləri siyahısında qərarlaşıb. Onunla Avropanın ən aparıcı klubları maraqlanır. Arda Turan üçün isə Almaniyanın “Şalke” klubundan 20 milyon avroluq rəsmi təklif gəlib. Avropa mətbuatında “Atletiko”nun maliyyə problemləri ilə üz-üzə olması səbəbindən satışa razılıq verəcəyi yazılıb.

Elşən MƏMMƏDOV