“Bakı” Çempionlar Liqası ilə vidalaşdı

UEFA Çempionlar Liqasının III təsnifat mərhələsinin cavab görüşlərinə yekun vurulub.

Lent.az-ın məlumatına görə, ikiqat Azərbaycan çempionu “Bakı” Bolqarıstanın “Levski” komandasına uduzaraq, qitənin ən nüfuzlu klub turnirində mübarizəni dayandırıb.

Avqustun 5-də Sofiya şəhərindəki Georgi Asparuxov adına stadionda keçirilən qarşılaşmada meydan sahibləri 2:0 hesabı ilə qalib gəliblər. Olduqca zəif təsir bağışlayan komandamızı Xristo Yovov (dəq. 64) və Georgi Xristov (dəq. 80) cəzalandırıb. İlk matçda 0:0 hesablı heç-heçə qeydə alındığından, iki oyunun nəticəsinə əsasən, “Levski” ÇL-in pley-off mərhələsinə yüksəlib. “Bakı” isə mübarizəni Avropa Liqasının pley-off mərhələsində davam etdirəcək.

İkinci oyun günündə başa çatan qarşılaşmalardan sonra “Ventspils” (Latviya), “Debretsen” (Macarıstan), “Timişoara” (Rumıniya), “Şerif” (Moldova), “Apoel” (Kipr), “Olimpiakos” (Yunanıstan), “Sürix” (İsveçrə), “Kopenhagen” (Danimarka) və “Seltik” (Şotlandiya) komandaları da ÇL-də mübarizəni davam etdirmək hüququ qazanıblar.

BATE (Belarus) – “Ventspils” (Latviya) – 2:1
İlk oyun – 0:1

“Debretsen” (Macarıstan) – “Levadiya” (Estoniya) – 1:0
İlk oyun – 1:0

“Timişoara” (Rumıniya) – “Şaxtyor” (Ukrayna) – 0:0
İlk oyun – 2:2

“Slaviya” (Çexiya) – “Şerif” (Moldova) – 1:1
İlk oyun – 0:0

“Partizan” (Serbiya) – “Apoel” (Kipr) – 1:0
İlk oyun – 0:2

“Olimpiakos” (Yunanıstan) – “Slovan” (Slovakiya) – 2:0
İlk oyun – 2:0

“Maribor” (Xorvatiya) – “Sürix” (İsveçrə) – 0:3
İlk oyun – 3:2

“Stabek” (Norveç) – “Kopenhagen” (Danimarka) – 0:0
İlk oyun – 1:3

“Dinamo” (Moskva, Rusiya) – “Seltik” (Şotlandiya) – 0:2
İlk oyun – 1:0

Qeyd edək ki, ilk oyun günündə “Anderlext” (Belçika), “Makkabi” (Hayfa, İsrail), “Panatinaikos” (Yunanıstan), “Zalsburq” (Avstriya) və “Sportinq” (Portuqaliya) da ÇL-in pley-off mərhələsinə vəsiqə qazanıb.