Səfir: ”Layihənin Gürcüstan hissəsində gecikmə olsa da...”

Uzun müddətdir tikintisi aparılan Bakı-Tbilisi-Qars dəmir yolu layihəsi bu il istifadəyə veriləcək. Bununla yanaşı gələcəkdə sözügedən dəmir yolunun Naxçıvana birləşdirilməsi də nəzərdə tutulur. Lent.az-ın məlumatına görə, bunu Türkiyənin Azərbaycandakı Fövqəladə və səlahiyyətli səfiri İsmail Alper Coşkun TTV-yə müsahibəsində bildirib. Səfir layihənin gecikməsinin səbəblərini də açıqlayıb. Bu il istifadəyə veriləcək Bakı-Tbilisi-Qars layihəsinin tikintisi plana uyğun davam etdirilir. Bir müddət əvvəl layihənin Gürcüstan hissəsində gecikmə yaransa da hazırda tikintinin aparılmasında heç bir maneə yoxdur. Bunu Türkiyənin Azərbaycandakı Fövqəladə və səlahiyyətli səfiri İsmail Alper Coşkun deyir. Onun sözlərinə görə, layihə hər üç ölkə hökumətinin diqqətindədir. Gələcəkdə Bakı-Tbilisi-Qarsa dəmir yolu xəttinin Naxçıvanla birləşdiriləcəyini deyən Türkiyəli diplomat hesab edir ki, bu addımın Naxçıvan iqtisadiyyatına çox böyük köməyi olacaq. İsmail Alper Coşkunun sözlərinə görə, bu layihə ilə hər üç ölkə loqistik mərkəzə çevriləcək. Xatırladaq ki, 2007-ci ildə Bakı-Tbilisi-Qars dəmiryolu xəttinin tikintisinin təməli qoyulub və hər üç ölkənin prezidentlərinin iştirakı ilə Gürcüstanın Marabda stansiyasında açılış mərasimi keçirilib. Qeyd edək ki, bu layihə Azərbaycan dəmir yollarını Avropa ilə birləşdirəcək və şərqdən-qərbə yük daşınmalarında əhəmiyyətli mövqeyə malik olacaq.