Bilal Əliyev Avropa və Amerikaya getməyə hazırlaşır

Müğənni silsilə konsertlərin ardınca Avropaya, oradan da Amerikaya yola düşəcək. Bu barədə sənətçinin özü Lent.az-a açıqlama verib: “Rusiyadan yeni qayıtmışam. Orada konsertlərimiz təşkil olunmuşdu. Hazırda Avropaya getməyə hazırlaşırıq, sonra konsert proqramı ilə çıxış etmək üçün Amerikaya gedəcəyəm. Daha sonra da İrana səfərim var”.

Bir çox sənətçidən fərqli olaraq xalq artisti Bilal Əliyev yayın isti günlərində heç bir yerdə istirahət etməyib. Bütün enerjisini yaradıcılığına həsr edən sənətkar hazırda yeni proqram üzərində çalışır: “Hazırda Azərbaycan o qədər inkişaf edib ki, dünyanın heç bir ölkəsinə gedib istirahət etməyə ehtiyac qalmayıb. Digər ölkələrdə olan istirahət guşələri artıq burada da var. Qəbələ, Quba, Xızı, Masallı, Yardımlı – sizcə, bu cür gözəl guşələri qoyub harasa getmək olar? Azərbaycanın yerini heç bir ölkə verə bilməz”.

Lalə Yusifqızı