“Best model of Azerbaijan-2010”-un prezidentləri müəyyənləşdi

Azərbaycanda “Best model of Azerbaijan-2010” yarışması keçiriləcək. Bununla əlaqədar olaraq, “Best model of the world” müsabiqəsinin prezidenti Erkan Özərman ötən gün Bakıya gəlib. Lent.az-ın məlumatına görə, builki müsabiqə Azərbaycanda vəfat edən mərhum biznesmen Nahid Kabakçının xatirəsinə ithaf olunacaq. Məhz Nahid Kabakçının təşəbbüsü ilə bu müsabiqə Azərbaycanda da təşkil olunmağa başlayıb.

Erkan Özərmanın Bakıya səfərinin məqsədi “Best model of Azerbaijan-2010” müsabiqəsinin Azərbaycan üzrə prezidentlərini təyin etməkdir. E.Özərman artıq Azərbaycan üzrə prezidentlərin kimliyini müəyyənləşdirib və bunu ötən gün hava limanında açıqlayıb. O, “Best model of Azerbaijan-2010” yarışmasının prezidentlik missiyasını Validə Abbasova və stilist Anar Ağakişiyevə həvalə edib. Rəsmi olaraq, bu məlumat isə Erkan Özərmanın iştirakı ilə bu gün keçiriləcək mətbuat konfransında açıqlanacaq. Konfransda bu günə kimi Azərbaycanın bu müsabiqə üzrə prezidentliyini həyata keçirmiş xalq artisti Aygün Kazımova, Validə Abbasova, Lyubov Qutorova və Ruhinin də iştirakı edəcəyi gözlənilir.
Xəyalə Muradlı