Zone Reality düşərgəsi başa çatdı

Layihənin bağlanış mərasimi oktyabrın 10-da “Le CHEVALİER Club”da keçiriləcək. Həmin mərasimdə düşərgənin qalib iştirakçısının kimliyi açıqlanacaq.
Zone Reality düşərgəsinin rəhbəri Günel Teymurun Lent.az-a verdiyi məlumata görə, qalibə noutbuk, qalib komandanın üzvlərinə isə hədiyyələr veriləcək. Bağlanış mərasiminin proqramı “Flame Production”-ın proqram meneceri tərəfindən yazılıb: “Bu, həmin menecerin Azərbaycanda ilk işi olacaq. Türkiyədə yeddi il bu sahədə çalışıb. Fərqli bir bağlanış mərasimi olacağına əminəm. İstəyən hər kəs qatıla bilər. Çünki həmin gün media nümayəndələrinə və qonaqlarımıza çoxlu sürprizlərimiz olacaq”.
Zone Reality Party-yə giriş qonaqlar üçün ödənişli olacaq. Biletin qiyməti 15 AZN-dir. Bağlanış party-si 17:00 da başlayacaq və 4 saat ərzində maraqlı proqramla davam edəcək.
Zone Reality Party layihəsinin informasiya dəstəyi Lent.az və Vesti.az xəbər portallarına məxsusdur.
Xatırladaq ki, 7 gün müddətində davam edən Zone Reality düşərgəsində qalib adı uğurunda mübarizəyə 14 iştirakçı qatılıb. Layihə ərzində dünyaca məşhur olan Survivor, Fear factor, Wire out və digər reality proqramlarının ən maraqlı oyunları, “Brain ring”, “Kim, harada, necə?” kimi intellektual oyunlar keçirilib.

Xəyalə Muradlı