NATO-nun seminarını Nizami Gəncəvinin şeiri yekunlaşdırdı

Bakıda keçirilən NATO Parlament Assambleyasının (PA) 86-cı “Rose-Roth” seminarının işinə Nizami Gəncəvinin əsərindən parçalarla yekun vurulub.

APA-nın məlumatına görə, “Cənubi Qafqaz: Çağırışlar və imkanlar” adlı seminarın son hissəsi Əfqanıstanla bağlı olub.

Seminarın yekununda Əfqanıstanın Strateji Araşdırmalar İnstitutunun direktoru Davud Moradian Nizami Gəncəvinin “Xosrov və Şirin” əsərindən fars dilində parça səsləndirməklə dünyanı eşqə, məhəbbətə və sülhə səsləyib. Amma bu zaman yanlışlığa yol verərək dahi şairimizi “fars şairi” adlandırıb.

Seminarın bu bölümünə aparıcılıq edən Azərbaycanın NATO PA-dakı nümayəndə heyətinin üzvü Məlahət İbrahimqızı dərhal D.Moradianın səhvini düzəldərək, Nizaminin böyük Azərbaycan şairi olduğunu və bütün tarixi mənbələrdə Azərbaycan türkü kimi qeyd olunmasını xatırladıb. M.İbrahimqızı əfqan diplomatın dediyi şeiri iştirakçılara Azərbaycan dilində təkrar edərək, seminarın son bölümünə yekun vurub.