Sərvət cəlb edəcək pul ağacını hara yerləşdirməli?

Bir çox insan pul ağacını sadəcə dekorativ bitki hesab etsə də, Feng-şui fəlsəfəsinə görə onun yerləşdirildiyi məkan ən azı bitkinin özü qədər önəmlidir. Mütəxəssislər bildirirlər ki, düzgün yerdə saxlanılan pul ağacı evdə bolluq və rifah enerjisini gücləndirə bilər.

Lent.az xarici mediaya istinadla xəbər verir ki, Feng-şuiyə əsasən, evin cənub-şərq hissəsi maliyyə və maddi rifah zonası hesab olunduğu üçün pul ağacını məhz bu hissədə yerləşdirmək tövsiyə edilir.

İnanclara görə, bu istiqamətdə yerləşən bitki pul enerjisini aktivləşdirir, yeni qazanc imkanlarının yaranmasına və maddi vəziyyətin yaxşılaşmasına kömək edir. Həmçinin həmin yer işıqlı, səliqəli və lazımsız əşyalardan təmiz olmalıdır.

Giriş qapısının yaxınlığı yeni imkanları simvolizə edir

Pul ağacının qoyulması üçün tövsiyə olunan digər yer giriş qapısının yaxınlığıdır. Feng-şuiyə görə, evin girişi enerji, insanlar və yeni imkanların daxil olduğu əsas nöqtə hesab edilir.

Bu səbəbdən girişdə yerləşdirilən sağlam və baxımlı pul ağacının maliyyə uğurunu qarşıladığı və onu evə dəvət etdiyi düşünülür. Əksinə, solmuş və baxımsız bitkinin mənfi enerji yaratdığına inanılır.

İş masasında saxlamaq karyera inkişafını dəstəkləyə bilər

Əgər məqsəd işdə və ya biznesdə uğur qazanmaqdırsa, mütəxəssislər pul ağacını iş masasının üzərinə və ya yaxınlığına qoymağı məsləhət görürlər.

İnanclara görə, bitki diqqətin cəmlənməsinə, motivasiyanın artmasına və yeni qazanc ideyalarının yaranmasına müsbət təsir göstərir. Xüsusilə işləyərkən bitkinin göz önündə olması daha faydalı hesab edilir.

Qonaq otağı ailə rifahını simvolizə edir

Qonaq otağı ailənin bir araya gəldiyi əsas məkan olduğundan, burada yerləşdirilən pul ağacı ümumi rifahın və maliyyə sabitliyinin rəmzi sayılır.

Bitkini otağın işıqlı küncünə yerləşdirmək ailə harmoniyasını və maddi inkişafı simvolizə edir. Feng-şui tərəfdarları hesab edirlər ki, belə mühitdə maliyyə ilə bağlı daha düzgün qərarlar qəbul etmək asanlaşır.

Pul ağacını harada saxlamaq məsləhət görülmür?

Feng-şuiyə görə, pul ağacını hamamda, qaranlıq künclərdə və ya qarışıqlıq olan yerlərdə saxlamaq tövsiyə edilmir. Bu məkanların enerji axınının zəifləməsinə səbəb olduğu və bitkinin simvolik təsirini azaltdığı bildirilir.

Pul ağacının təsirini necə artırmaq olar?

Feng-şui tərəfdarları bitkiyə mütəmadi qulluq etməyi vacib sayırlar. Yarpaqları təmiz saxlamaq, qurumasına imkan verməmək və ehtiyac olduqda daha böyük dibçəyə köçürmək tövsiyə edilir. Bəzi insanlar dibçəyin altına metal pul qoyurlar. Bu, davamlı maliyyə artımının rəmzi hesab olunur.