Android əməliyyat sistemli telefonlar müəyyən müddətdən sonra ləngiməyə, tətbiqləri daha gec açmağa başlaya bilər. Bunun əsas səbəblərindən biri sistemdə və tətbiqlərdə toplanan müvəqqəti fayllar keş məlumatlarıdır. Bu fayllar təkcə yaddaşı doldurmur, eyni zamanda cihazın ümumi performansını da zəiflədir.
Lent.az xarici mediaya istinadla xəbər verir ki, mütəxəssislərin sözlərinə görə, keşin təmizlənməsi Android cihazın sürətini artırmağın ən sadə və təsirli yollarından biridir. Bu proses istehsalçıdan asılı olaraq bir qədər fərqlənsə də, ümumi addımlar eynidir.
Androiddə keş necə təmizlənir?
Əvvəlcə telefonunuzda Android üçün “Ayarlar” bölməsinə daxil olun. Daha sonra “Yaddaş” və ya “Saxlama” bölməsini açaraq “Tətbiqlər” hissəsinə keçin. Burada quraşdırılmış bütün proqramların siyahısı və yaddaşı ən çox istifadə edən tətbiqlər görünəcək. Adətən messencerlər, sosial şəbəkələr və brauzerlər bu siyahının başında olur.
Seçilmiş tətbiqin üzərinə daxil olub “Keşi təmizlə” düyməsini sıxmaq kifayətdir. “Yaddaşı təmizlə” seçimi ilə qarışdırmaq olmaz, çünki bu, tətbiqin bütün məlumatlarının silinməsinə səbəb ola bilər. Bu addımları ən “ağır” tətbiqlər üçün təkrarlamaq tövsiyə olunur.
Bəzi Android cihazlarda “Yaddaş” bölməsində avtomatik “Yer boşalt” funksiyası da mövcuddur. Bu zaman Google Files tətbiqi vasitəsilə lazımsız fayllar silinir. Bunun üçün “Files” tətbiqini açıb “Lazımsız faylları təmizlə” seçimini etmək kifayətdir.
Brauzer keşinin təmizlənməsi
Brauzerlər keşin ən çox toplandığı tətbiqlərdən biridir. Google Chrome, Edge, Brave və digər brauzerlərdə bu prosesi həyata keçirmək üçün brauzeri açmaq, sağ yuxarı küncdəki üç nöqtəyə toxunmaq, “Tarixçə” və ardından “Tarixçəni təmizlə” bölməsinə keçmək lazımdır. Burada vaxt aralığını “bütün müddət” olaraq seçib keşlənmiş faylları və şəkilləri işarələyərək silmək mümkündür.
Keşi nə qədər tez-tez təmizləmək lazımdır?
Mütəxəssislər cihazda yavaşlama və ya tətbiqlərdə nasazlıq hiss edildikdə keşin təmizlənməsini tövsiyə edirlər. Əksər istifadəçilər üçün bu prosesi üç-altı ayda bir dəfə etmək kifayətdir.
Qeyd olunur ki, keşin silinməsi yalnız yaddaşı boşaltmır, eyni zamanda tətbiqlərin düzgün işləməməsi ilə bağlı problemləri də aradan qaldıra bilər. Bu, sürətli diaqnostika və nasazlıqların həlli üçün effektiv üsul sayılır.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
