“Google” “Android Auto”dakı aylardır davam edən problemi həll edir

“Google” “Android Auto” sistemində mobil telefonun şəbəkə siqnalını göstərən ikonun yoxa çıxmasına səbəb olan problemi aradan qaldırıb.

Lent.az xəbər verir ki, şirkət düzəlişi istifadəçilərə mərhələli şəkildə təqdim etməyə başlayıb və yeniləmənin son versiyalara daxil edildiyi bildirilir.

Sözügedən problem 2026-cı ilin əvvəlindən etibarən istifadəçilərin qarşılaşdığı nasazlıqlardan biri olub. Avtomobilin ekranında mobil şəbəkə göstəricisinin yerində boş sahə yaranırdı.

Bu nasazlıq telefonun mobil şəbəkə bağlantısına təsir göstərmirdi, yəni zəng etmək və mesaj göndərmək mümkün olaraq qalırdı; problem yalnız göstəricinin ekranda görünməməsi ilə bağlı idi.

“Google” nümayəndəsi Mişal Rahman problemdən xəbərdar olduqlarını və düzəlişin artıq yayılmağa başladığını bildirib.

Yeniləmənin mərhələli şəkildə təqdim edilməsi səbəbindən bəzi istifadəçilər düzəlişi dərhal əldə etməyə bilər.