iPhone istifadəçilərinin bəziləri kilid ekranında batareya göstəricisinin altında yerləşən nazik üfüqi xəttin nə məqsədlə istifadə edildiyini maraqla qarşılayır. Mütəxəssislər bildirirlər ki, bu element heç bir nasazlıq və ya sistem xətası deyil, iOS əməliyyat sisteminin nəzərdə tutulmuş funksiyalarından biridir.
Lent.az xarici mediaya istinadla xəbər verir ki, sözügedən xətt istifadəçilərə kilid ekranından "İdarəetmə Mərkəzi"nə (Control Center) sürətli giriş imkanı olduğunu xatırladan vizual göstərici rolunu oynayır.
Bu xətt istifadəçiyə ekranın yuxarı sağ hissəsindən aşağı sürüşdürmə hərəkəti edərək "İdarəetmə Mərkəzi"ni açmağın mümkün olduğunu göstərir. Burada Wi-Fi, Bluetooth, təyyarə rejimi, ekran parlaqlığı, fənər və digər vacib funksiyalar üçün sürətli idarəetmə düymələri yerləşir.
Apple bu elementi istifadəçilərin kilid ekranında belə sürətli parametrlərə çıxış imkanını daha rahat başa düşməsi üçün əlavə edib. Beləliklə, xətt sadəcə jest idarəetməsini xatırladan bir göstəricidir.
Xətti ekrandan necə gizlətmək olar?
Əgər bu göstərici ekranın görünüşünü pozursa, onu qismən gizlətmək mümkündür. Bunun üçün kilid ekranından "İdarəetmə Mərkəzi"nə giriş funksiyasını söndürmək lazımdır.
Bunu etmək üçün aşağıdakı addımları yerinə yetirmək kifayətdir:
iPhone-un "Parametrlər" (Settings) bölməsini açın;
"Face ID və parol" (Face ID & Passcode) menyusuna daxil olun;
"Kilidli vəziyyətdə girişə icazə ver" (Allow Access When Locked) bölməsinə keçin;
"İdarəetmə Mərkəzi" (Control Center) seçimini deaktiv edin.
Lakin bu üsul xətti tamamilə aradan qaldırmır. Xətt yalnız cihaz kilidli olduqda görünmür. Face ID vasitəsilə telefonun kilidi açılmağa başlayan kimi göstərici qısa müddətə yenidən ekranda görünür.
Touch ID ilə təchiz olunmuş iPhone modellərində isə bu effekt daha nəzərəçarpandır. Çünki cihaz avtomatik açılmadığından ekran daha uzun müddət ərzində göstəricisiz qala bilir.
Mütəxəssislərin fikrincə, kilid ekranında "İdarəetmə Mərkəzi"nə girişi bağlamaq təhlükəsizlik baxımından da faydalı ola bilər. Bu halda telefon oğurlandıqda və ya itirildikdə, kənar şəxslər cihazı açmadan təyyarə rejimini aktivləşdirə və ya rabitəni söndürə bilməzlər.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
