Müasir təhlükəsizlik sistemlərinə baxmayaraq, diqqətli qalmaq vacibdir. Bugünkü smartfonlar çoxsaylı təhlükəsizlik mexanizmləri ilə təchiz olunub, buna görə də iPhone-u sındırmaq əvvəlkindən daha çətindir. Lakin kibertəhlükəsizlik mütəxəssisləri xəbərdarlıq edir: bu, hələ də mümkündür.
Lent.az xarici KİV-ə istinadən xəbər verir ki, rəqəmsal dövrdə yalnız cihazı deyil, həm də onun daxilində saxlanılan şəxsi məlumatları qorumaq vacibdir. Çünki bəzən dələduzlar bu məlumatlara istifadəçinin xəbəri olmadan daxil ola bilirlər. İnsan çox vaxt cihazının ələ keçirildiyini dərhal anlamır. Kibertəhlükəsizlik mütəxəssisi Emi Mortlok (Shadow Dragon şirkətindən) bu barədə She Finds nəşrinə danışaraq, iPhone-un sındırıldığını göstərə biləcək iki əsas əlaməti açıqlayıb və riski minimuma endirməyin yollarını izah edib.
1. Batareya çox tez boşalır
Əgər iPhone-unuz qəfil daha tez enerji itirməyə başlayıbsa və istifadə vərdişləriniz dəyişməyibsə, bu, narahatedici siqnaldır. Mortlok bildirir ki, belə hallarda cihazın sistemində gizli proqram işləyə bilər. Bu proqram cihazın resurslarından istifadə edir, onu qızdırır və batareyanı tez tükəndirir.
Bunu yoxlamaq üçün Parametrlər → Batareya bölməsinə daxil olun. Əgər siyahının yuxarısında sizə tanış olmayan və ya şübhəli tətbiq görünürsə, diqqətli olmaq lazımdır.
2. Naməlum tətbiqlərin peyda olması
Əgər ekranda sizin yükləmədiyiniz tətbiqlər görünürsə, bu, ciddi təhlükə siqnalıdır. Mortlok xəbərdarlıq edir ki, bəzən hakerlər casus proqramlarını məhz belə şəkildə zərərsiz görkəm altında yerləşdirirlər. Bu tətbiqlər istifadəçinin hərəkətlərini izləyə və şəxsi məlumatları oğurlaya bilər.
Məlumat və cihazınızı necə qorumaq olar
Mütəxəssis ilk növbədə iOS-u mütəmadi yeniləmək tövsiyə edir:
“Yeniləmələr çox vaxt hakerlərə artıq məlum olan zəif nöqtələri aradan qaldıran təhlükəsizlik yamaları ehtiva edir. Ən yaxşısı avtomatik yeniləmələri aktivləşdirməkdir ki, vacib düzəlişləri qaçırmayasınız".
Bundan əlavə, Mortlok mürəkkəb təhlükəsizlik üsullarından istifadə etməyi məsləhət görür:
4 rəqəmli kod əvəzinə 6 rəqəmli giriş kodu qurun.
Face ID və ya Touch ID funksiyasını aktivləşdirin.
Apple ID üçün iki addımlı identifikasiyanı qoşun. Bu, bir neçə müdafiə səviyyəsi yaradır: hətta kimsə parolunuzu öyrənsə belə, ikinci təsdiq olmadan hesabınıza daxil ola bilməz.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
