OpenAI şahmat turnirində Grok-u məğlub etdi

OpenAI-nin o3 modeli xAI şirkətinin hazırladığı Grok 4 modelini Kaggle AI Exhibition şahmat turnirinin finalında 4:0 hesabı ilə məğlub edib.

Lent.az xarici mediaya istinadən xəbər verir ki, yarışda həmçinin Anthropic, DeepSeek, Google və Moonshot AI şirkətlərinin digər süni intellekt modelləri də iştirak ediblər. Final qarşılaşması, OpenAI-nin həmtəsisçiləri Sam Altman və Elon Musk arasında son dərəcə gərgin münasibətlərin fonunda xüsusi məna kəsb edib. Musk, OpenAI-dən ayrıldıqdan sonra şirkəti almağa cəhd göstərmişdi. Turnirin finalında o3 modeli qüsursuz oyun nümayiş etdirərək Grok 4 üzərində bütün 4 partiyada qələbə qazanıb.

Hər iki sistem əvvəlki mərhələlərdə rəqiblərini məğlub edərək finala yüksəlib. Şahmatdakı məğlubiyyətə cavab olaraq Musk bildirib ki, modelin oyun qabiliyyəti “əlavə effekt”dir və onun hazırlanmasında prioritet olmayıb. Kompüterlərin dünyanın ən güclü şahmat ustalarını məğlub etmə qabiliyyəti 1997-ci ildən məlumdur - həmin il IBM-in Deep Blue adlı superkompüteri Garry Kasparov-u məğlub etmişdi. Sonradan Google DeepMind şirkəti şahmat və go oyunlarını öz-özünə öyrənə bilən süni intellekt modelini yaratdı. Lakin yeni turnir, ChatGPT kimi böyük dil modellərinin (LLM) sınaqdan keçirildiyi ilk böyük yarış oldu.

Take Take Take şirkətinin baş direktoru və həmtəsisçisi Mats Andre Kristiansen qeyd edib ki, 1990-cı illərdə Kasparov-un Deep Blue-ya qarşı oyunu böyük hadisə olsa da, hazırkı turnirin əsas dəyəri müasir süni intellekt modellərinin necə düşündüyünü və qərar qəbul etdiyini araşdırmaqdır. Maraqlıdır ki, iyul ayında hazırkı dünya şahmat çempionu Magnus Carlsen onlayn qarşılaşmada ChatGPT-ni heç bir fiqur itirmədən məğlub edib. Grok və o3 arasındakı finalı şərh etmiş Carlsen, Grok-un şahmat reytinqini təxminən 800, o3 modelinin reytinqini isə 1200 xal səviyyəsində qiymətləndirib. Müqayisə üçün, onun özünün pik dövrdəki reytinqi 2882 xal olub. Sosial şəbəkə X-də istifadəçinin sualını cavablandıran Grok isə öz səviyyəsini 1600-1800 aralığında dəyərləndirib.