Routerdəki USB girişi nə üçündür?

Evdə istifadə edilən routerin üzərindəki kiçik USB girişi cihazı sadə internet paylayıcısından fayl yaddaşına, media serverinə, hətta ehtiyat internet mənbəyinə çevirə bilər.

Lent.az xəbər verir ki, bir çox routerdə USB girişi illərlə istifadə olunmadan qalır. Halbuki bəzi modellərdə bu girişə xarici yaddaş qurğusu, printer və ya mobil internet modemi qoşmaq mümkündür. Bununla belə, USB imkanları routerin modelindən və proqram təminatından asılıdır. USB girişinin olması bütün funksiyaların dəstəkləndiyi demək deyil. Buna görə cihazın texniki xüsusiyyətlərini əvvəlcədən yoxlamaq lazımdır.

Xarici yaddaş qurğusu qoşmaq mümkündür

Ən praktik variantlardan biri fleş yaddaş və ya xarici sərt diski routerə qoşmaqdır. Router uyğun funksiyanı dəstəkləyirsə, həmin yaddaşdakı fayllara ev şəbəkəsinə qoşulmuş müxtəlif cihazlardan daxil olmaq olar. Beləliklə, fotoşəkillər, sənədlər, musiqi və videolar bir yaddaş qurğusunda saxlanılır, lakin onlardan müxtəlif kompüter, telefon və televizorlarda istifadə etmək mümkün olur. Bu sistem sadələşdirilmiş NAS yaddaşına bənzəyir. Ancaq router adətən peşəkar şəbəkə yaddaş sistemini tam əvəz edə bilmir. Məlumat ötürmə sürəti routerin gücündən, USB versiyasından, yaddaş qurğusundan və şəbəkənin imkanlarından asılı olur.

USB 2.0 nəzəri olaraq saniyədə 480 Mbit sürəti dəstəkləsə də, real göstərici routerin prosessoru və digər texniki məhdudiyyətlərə görə daha aşağı ola bilər. USB 3.x isə daha yüksək sürət təklif edir.

Routeri media serverinə çevirmək olar

Bəzi routerlər media server funksiyasını dəstəkləyir. Bu halda qoşulmuş sərt disk və ya fleş yaddaşda saxlanan film, musiqi və digər faylları televizor, kompüter və uyğun cihazlarda birbaşa ev şəbəkəsi vasitəsilə açmaq mümkündür. Belə sistemdə diski hər dəfə televizorla kompüter arasında daşımağa ehtiyac qalmır. Ancaq yüksək keyfiyyətli və böyük həcmli videoların izlənilməsi üçün güclü router və stabil bağlantı tələb oluna bilər. Belə hallarda Ethernet kabeli Wi-Fi bağlantısından daha etibarlı ola bilər.

USB ehtiyat internet üçün də istifadə oluna bilər

Bəzi router modelləri uyğun 4G və ya 5G USB modemləri dəstəkləyir. Düzgün sazlama aparıldıqda əsas internet bağlantısı kəsilən zaman router avtomatik olaraq mobil internetə keçə bilər. Bu funksiya xüsusilə evdən işləyənlər, müşahidə kameralarından istifadə edənlər və daim internetdə qalmalı olan cihazlar üçün faydalı ola bilər. Lakin istənilən USB modemi routerə qoşaraq işlətmək mümkün deyil. Həm router bu funksiyanı dəstəkləməli, həm də modem cihazın proqram təminatı ilə uyğun olmalıdır.

Köhnə printeri şəbəkəyə qoşmaq mümkündür

Wi-Fi dəstəyi olmayan bəzi köhnə printerlər də routerin USB girişindən istifadə edə bilər. Print-server funksiyasını dəstəkləyən routerə printer USB ilə qoşulduqda, lokal şəbəkədəki bir neçə kompüter həmin printerdən istifadə edə bilər. Lakin bu üsulda bəzi məhdudiyyətlər mövcuddur. Məsələn, çoxfunksiyalı printerdə çap işləsə də, skan funksiyası router üzərindən dəstəklənməyə bilər.

USB-dən enerji almaq da mümkündür

Routerin USB girişi enerji verdiyi üçün bəzi az enerji tələb edən cihazları buradan qidalandırmaq mümkündür. Ancaq routeri universal şarj cihazı kimi istifadə etmək məsləhət deyil. USB girişinin cərəyan gücü məhdud ola və sürətli enerji doldurma texnologiyalarını dəstəkləməyə bilər. Bu problem xüsusilə xarici sərt disklərdə ortaya çıxa bilər. Disk routerin verə bildiyindən daha çox enerji tələb edərsə, yaddaş qurğusu sönə, məlumat ötürülməsində səhvlər yarana, hətta router yenidən başlaya bilər. Belə disklər üçün ayrıca enerji mənbəyindən istifadə etmək daha məqsədəuyğundur.

Təhlükəsizliyi unutmaq olmaz

Routerə qoşulmuş disk şəbəkə yaddaşı kimi istifadə edilirsə, girişin istifadəçi adı və şifrə ilə qorunması tövsiyə olunur. Zərurət olmadıqda bu yaddaşa internet üzərindən uzaqdan giriş funksiyasını aktivləşdirmək məsləhət görülmür. Bundan əlavə, vacib faylların yalnız routerə qoşulan diskdə saxlanılması düzgün deyil. Məlumatların ən azı daha bir ehtiyat nüsxəsinin olması tövsiyə edilir.