Yeni telefon batareyaları yaradılır - Enerji bitməyəcək

Samsung şirkəti 2027-ci ilin ikinci yarısından etibarən bərk elektrolitli (solid-state) batareyaların kütləvi istehsalına başlamağı planlaşdırır. Sənayedə artıq arzu batareyası adlandırılan yeni texnologiyanın Galaxy smartfonlarının batareya ömrünü əhəmiyyətli dərəcədə artıracağı, enerji yığımını sürətləndirəcəyi və yanğın riskini minimuma endirəcəyi bildirilir.

Lent.az xəbər verir ki, bu barədə PhoneArena məlumat yayıb.

Yeni batareyaların əsas fərqi hazırda istifadə olunan litium-ion batareyalardan fərqli olaraq maye deyil, bərk elektrolitdən istifadə edilməsidir. Bu isə metal litium anodunun tətbiqinə imkan yaradır, nəticədə enerji sıxlığı artır, batareyanın ölçüsü isə kiçilir.

Beləliklə, yeni nəsil batareyalar daha yüngül və kompakt olmaqla yanaşı, eyni ölçüdə daha çox enerji saxlaya bilir. Bundan əlavə, ion keçiriciliyinin yaxşılaşması və istiliyin daha səmərəli ötürülməsi sayəsində onların bir neçə dəqiqə ərzində enerji toplamaq potensialına malik olduğu qeyd edilir.

Yeni texnologiyanın digər mühüm üstünlüyü təhlükəsizlikdir. Tərkibində alışa bilən maye elektrolit olmadığından batareyanın zədələnməsi zamanı həddindən artıq qızma, alışma və ya partlayış ehtimalı xeyli azalır. Şirkətin keçirdiyi ilkin sınaqların müsbət nəticə verdiyi, istifadəçilərin enerji sıxlığı və təhlükəsizlik göstəricilərini yüksək qiymətləndirdiyi bildirilir.

Samsung təxminən 10 ildir ki, bu texnologiyanın tətbiqi üzərində işləyir. Şirkət hələ 2017-ci ildə gələcək Galaxy modellərində bərk elektrolitli batareyalardan istifadə etməyi planlaşdırdığını açıqlamışdı. Lakin indiyədək bu batareyaya malik heç bir seriya istehsalı modeli təqdim edilməyib.

Bununla belə, texnologiyanın geniş yayılmasına yüksək istehsal xərcləri mane olur. SNE Research-in qiymətləndirməsinə görə, hazırda bərk elektrolitli batareyaların istehsalı hər kilovat-saat üçün təxminən 400–600 dollara başa gəlir. Müqayisə üçün, ənənəvi litium-ion batareyalarda bu göstərici təxminən 81 dollardır. Bu səbəbdən yeni texnologiyaya sahib ilk cihazların mövcud modellərdən daha bahalı olacağı gözlənilir.

Analitiklərin fikrincə, bərk elektrolitli batareyalar əvvəlcə smartfonlarda deyil, Galaxy Watch və Galaxy Ring kimi kiçik ölçülü cihazlarda istifadə ediləcək.

Məlumata görə, Galaxy S27 seriyası hələ ənənəvi batareyalarla satışa çıxacaq. Yeni texnologiyanın isə 2028-ci ildə təqdim olunacağı gözlənilən Galaxy S28 seriyasında debüt edəcəyi proqnozlaşdırılır. Proqnozlar doğrulansa, Samsung-un gələcək flaqman smartfonları bir enerji yığımı ilə bir neçə gün işləyə və rəqiblərindən xeyli sürətli enerji toplaya biləcək.

Mütəxəssislər hesab edirlər ki, bərk elektrolitli batareyalar enerji saxlama texnologiyalarının növbəti inkişaf mərhələsidir. Bu texnologiyanın gələcəkdə təkcə smartfon və geyilə bilən cihazlarda deyil, həmçinin elektromobillər və robotlarda da geniş tətbiq olunacağı gözlənilir.