Lənkəran rayonunun Separadi kəndində fəaliyyət göstərən "Nənələr" folklor və rəqs ansamblı, Azərbaycanın zəngin mədəni irsini yaşadan və təbliğ edən unikal kollektivlərdən biridir. 1970-ci ildə əsası qoyulan bu ansambl, yarım əsrdən artıqdır ki, Azərbaycan və talış xalq mahnılarını, bayatıları və rəqsləri ifa edərək milli musiqi xəzinəmizi zənginləşdirir.
Lent.az xəbər verir ki, əvvəlcə "Bacılar" adı ilə tanınan qrup, dörd bacıdan ibarət idi: Gülbacı, Ağabacı, Xanımbacı və Qızbəs. Onların səmimi ifaları və təbii istedadları sayəsində qısa zamanda yerli məclislərdə məşhurlaşdılar. 1997-ci ildə Ümummilli Lider Heydər Əliyevin Lənkərana səfəri zamanı, o, qrupa "Nənələr" adını təklif etdi və bu ad həmin ildən etibarən rəsmi olaraq qəbul edildi.
"Nənələr" ansamblının repertuarı çox zəngindir və 100-ə yaxın Azərbaycan və talış dillərində mahnı və bayatıları əhatə edir. Xüsusilə "Ay lolo" mahnısı ilə tanınan qrup, bu ifası ilə 2012-ci ildə "Grand" mükafatına layiq görülüb.
Ansamblın üzvləri musiqi təhsili almamış olsalar da, onların valideynləri də ifaçı olub və bu sənəti uşaqlıqdan öyrəniblər. Hazırda qrupun ən yaşlı üzvü 91 yaşlı Xanımbacı Quliyevadır. Qrupun hazırda 6 üzvü var: bacı olan 2 qaynana, onların 2 gəlini və gəlinlərin gəlinləri. Onlar tez-tez bir araya gələrək məşqlər edir və ifa edirlər.
"Nənələr" ansamblı təkcə Azərbaycanda deyil, həm də xaricdə keçirilən festivallarda uğurla iştirak edir və milli musiqimizi layiqincə təmsil edir. Onların ifaları, sadəcə musiqi deyil, həm də Azərbaycan xalqının ruhunu, adət-ənənələrini və mədəniyyətini əks etdirir.
Bu gün "Nənələr" qrupu, gənc nəsillərə milli musiqimizi öyrətməklə, mədəni irsimizin qorunmasına və gələcək nəsillərə ötürülməsinə böyük töhfə verir. Onların fəaliyyəti, musiqimizin canlı tarixidir və bu irsin yaşadılması üçün əvəzsizdir.
Bizi Telegram-da izləyin
t.me/lent_az
Bizi Instagram-da izləyin
Bizi Facebook-da izləyin
Bizi Twitter-da izləyin
