Putin: "ABŞ-ın hərəkətini anlamıram"

Rusiya prezidenti Vladimir Putin ABŞ-ın dialoqdan imtina etməsinə münasibət bildirib.

APA-nın “RİA Novosti”yə istinadən verdiyi məlumata görə, Putin bildirib ki, ABŞ-ın Rusiyanın Suriyadakı əməliyyatını tənqid etməsini və eyni zamanda dialoqdan qaçmasını anlamır: “Mən ABŞ-ın problemin siyasi həlli üçün vacib olan dialoqdan qaçdığı halda Rusiyanın Suriyada terrorizmlə mübarizə aparmasını tənqid etməsini anlamıram”, - deyə o bildirib.

Qeyd edək ki, iki gün öncə Rusiya prezidenti yüksək hərbi-siyasi səviyyədə Moskvada beynəlxalq görüşün keçirilməsini təklif edib, habelə baş nazir Dmitri Medvedevin rəhbərliyi ilə Vaşinqtona nümayəndə heyəti göndərməyə hazır olduğunu bəyan edib. Lakin ötən gün Rusiya xarici işlər naziri Sergey Lavrov ABŞ-ın Rusiya nümayəndə heyətini qəbul etməkdən imtina etdiyi açıqlayıb.