“Zərbəli” ləqəbli avtoritet qardaşını öldürdü

Abşeronda qətl hadisəsi baş verib. Bu barədə Lent.az-a Abşeron Rayon Polis İdarəsindən məlumat bildirilib. Aprelin 4-də günorta saatlarında 15 ildir, axtarışda olan “Zərbəli” ləqəbli kriminal avtoritet, 1954-cü il təvəllüdlü Tağıyev Əzizağa Rəhman oğlu qardaşı, 1967-ci il təvəllüdlü Tağıyev Əlövsəti bıçaqlayaraq öldürüb. Daha sonra o, hadisə yerindən qaçıb.

İki qardaş arasında baş verən münaqişənin səbəbi kimi Ə.Tağıyevin içkili olması və qardaşına söyüş söyməsi göstərilir. Bundan qəzəblənən Ə.Tağıyev qardaşını bıçaqlayıb.

Polis İdarəsindən onu da bildiriblər ki, “Zərbəli” ləqəbli avtoritet törətdiyi başqa cinayətlərə görə 15 il axtarışda olub. Onun Rusiyada gizləndiyi və 3 gün əvvəl Azərbaycana gəldiyi bildirilib. Ə.Tağıyevin tutulması istiqamətində əməliyyat-axtarış tədbirləri davam etdirilir.

Faktla bağlı Azərbaycan Respublikası Cinayət Məcəlləsinin 120-ci (qəsdən adam öldürmə) maddəsi ilə cinayət işi açılıb, araşdırma aparılır.

Fərid Əkbərov