Lənkəranda ata oğlunu qətlə yetirdi

Kəllə-beyin travması alan rayon sakinini xilas etmək mümkün olmayıb

Azərbaycanın Lənkəran rayonunda qətl hadisəsi baş verib. APA-nın cənub bürosunun məlumatına görə, iyunun 4-də saat 22.00 radələrində rayonun Girdəni kəndində kənd sakini, 1946-cı il təvəllüdlü Bahaddin Hacı oğlu Hüseynovla onun oğlu - 1969-cu il təvəllüdlü Tərlan Hüseynov arasında torpaq üstündə mübahisə yaranıb.

Mübahisə nəticəsində ata oğluna xəsarət yetirib, T. Hüseynov kəllə-beyin travması və sol gözünün hematoması diaqnozu ilə Lənkəran Mərkəzi Rayon Xəstəxanasının (MRX) reanimasiya şöbəsinə yerləşdirilib. Həkimlərin səylərinə baxmayaraq, 3 uşaq atası olan T. Hüseynov bu gün saat 15.00 radələrində xəstəxanada dünyasını dəyişib. Hadisəni törətmiş 64 yaşlı Bahaddin Hüseynov həbs olunub.

Faktla bağlı Lənkəran Rayon Prokurorluğunda Cinayət Məcəlləsinin 126.3 maddəsi ilə cinayət işinə başlanıb, araşdırma aparılır.