"Ağ şəhər"də canlı yayımda söyüş söyən tiktoker SAXLANILDI

Sosial şəbəkələrdə əxlaq normalarını pozan daha bir tiktoker saxlanılıb.

Lent.az-ın əldə etdiyi xəbərə görə, 20 yaşlı Fərid Nəsirov (şərti adla) “Ağ şəhər” ərazisində avtomobilində tiktok sosial şəbəkəsinə daxil olaraq, canlı yayım açıb. Yayım zamanı isə nalayiq ifadələr işlədib. Bununla da ictimai mənəviyyatı təhqir edən əməllərə yol verib.

Faktla bağlı F. Nəsirov polis əməkdaşları tərəfindən saxlanılıb və barəsində İnzibati Xətalar Məcəlləsinin 510.2-ci (internet informasiya ehtiyatında və ya informasiya-telekommunikasiya şəbəkəsində kütləvi nümayiş etdirildiyi halda ictimai mənəviyyatı təhqir edən, cəmiyyətə açıqca hörmətsizlik ifadə edən hərəkətlərin edilməsinə, yəni əxlaqsız ifadələrin səsləndirilməsinə və ya belə məzmun təəssüratı yaradan jestlərin edilməsinə, yaxud insan bədəninin hissələrinin əxlaq normalarına və milli-mənəvi dəyərlərə zidd formada göstərilməsinə görə) maddəsilə protokol tərtib olunub.

Fərid Nəsirov bildirib ki, canlı yayım açdığı zaman izləyicilərdən biri onu təhqir edib. O da bu təhqirə əsəbiləşərək, nalayiq ifadə işlədib. O, əməlindən peşman olduğunu və gələcəkdə bir daha belə hallara yol verməyəcəyini bildirib.

Məhkəmə onun barəsində 700 manat inzibati cərimə cəzası təyin edib.